اسلام آباد۔ 4دسمبر (اے پی پی) وزیراعظم عمران خان داہیت انا اعادہ ءِ کرینے کہ حکومت شفافیت آ یخین تخک و زرکار آتے آسراتی تننگ تون اوار اوار اوفتے ملک انا مون آ ہنوک معیشت اٹی ساڑی گیشتر وارخواہی تیان پبی فائدہ ہرفنگ کن سازگار چاگڑد فراوان کننگ کن پرعزم ءِ۔ اوداہیت ءِ ٹیلی نار گروپ نا صدر و چیف ایگزیکٹو آفیسر سگوی بریکی تون ہیت وگپ کرسا پارے ہراسے شنبے نادے وزیراعظم آفس اٹی اوڑتون اوڑدہی کرے۔سگوی بریکی وزیراعظم ءِ پاکستان اٹی زرکاری نا بابت ٹیلی نار نا آزموندہ غان معلومدار کرسا اودے بے کچ است جم گوندا۔ او ٹیلی کام بشخ اکن پدریسہ کمک و براہ راست درملکی زرکاری نا است بڈی آ پاکستان نا حکومت نا منت واری ءِ ہرفے۔ اوپارے کہ ٹیلی نار گروپ 2005 ء آن پاکستان اٹی کاریم کننگ ءِ و او ملکی راجی و اقتصادی شونداری آ نمان مثبت اثر مرتب کرینے۔ گروپ 3.5 ارب ڈالر نا زرکاری کرے و 5 ہزار براہ راست ملازمت فراوان کننگ آن بیدس بالواسطہ وڑاٹ لکھ آتا کچ اٹی روزگار ودی کرے۔ سگوی بریکی وزیراعظم ءِ پارے کہ ٹیلی نار نا آخبت نا ڈٹ آتے ٹی مالیاتی خذمت آتے ٹی ودکی کننگ، کشار گرآتے ڈیجیٹل دنیا تون گنڈنگ و تینا خذمت آتے ہیلتھ کیئر و ڈیجیٹل کاروبار اٹی ودفنگ اوار ءِ۔ اوپارے کہ دا گام گیج آتا کمک اٹ ٹیلی نار گروپ تینا داڑے گدرینگوک آ 13سال انا آزموندہ غاتے کاریم اٹ اتسا پاکستان نا الس نا مست آن جوان خذمت ءِ کننگ کن پرعزم ءِ۔ اووزیراعظم ءِ ’’اینٹ فنانشیل‘‘ تون پڑو کروک ساڑی آ شریداری ٹی 140 ملین ڈالر نا آخبت نا زرکاری آن ہم معلومدار کرے۔ وزیراعظم ٹیلی کام نا بشخ اٹی ٹیلی نار نا خذمت آتا ستاءِ کرسا پارے کہ حکومت پاکستان اٹی علم آ مبنی معیشت ءِ مون آ دننگ خواہک و ٹیلی نار ءِ ایکو سسٹم نامون آ دننگ اٹ اہم شریدار تکک ہرا حکومت نا شونداری ایجنڈا ٹی کمکار ءِ۔
