اسلام آباد۔ 04دسمبر (اے پی پی) بنجائی وزیر خزانہ اسد عمر پارینے کہ ملک اٹی ہچ ءُ معاشی تنکی اس اف، دا بابت آن ہیجانی کیفیت ودکی کننگ درست اف، ملک اٹی زوت بھلو زرکاری اس بریک، برآمد آک ودنگ ءُ وخت اس کہ نسخان اٹی کمتی بننگ ءِ ، بنداوی ویل آتا ایسری کن ہم گام گیج کننگ انگ ءِ۔ اوسے شنبے نادے داڑے یانزدہ می سویلی ایشیا ئی اقتصادی سمٹ نا بنائی دود آن تران کریکہ۔ چار دے ئی کانفرنس نا بست و بند ءِ پالیسی ادارہ پائیدار شونداری (ایس ڈی پی آئی ) کرے۔ داوخت آ مسکوہی نگران وزیر خزانہ ڈاکٹر شمشاد اختر ہم تران کرے۔ بنجائی وزیر ملک انا معاشی حالیت و اوٹی گچینی کن حکومت نا کنڈان کروک آ گام گیج آتے تالان کرسا پارے کہ ملک انا اقتصادی ٹک آک گچینی نا کنڈاروان ءُ۔ اوپارے کہ ایکسچینج ریٹ انا فیصلہ سٹیٹ بینک نا اختیار ءِ و بینک دا بابت فیصلہ کننگ نا اختیار ءِ برقرار تخک البتہ ضرورت مس تو اسٹیٹ بینک نا وڑوڈول ءِ سوگو کننگک۔ اوپارے کہ پی ٹی آئی نا پالیسی ٹی ہچ ءُ بدلی اس بتنے۔ اسٹیٹ بینک نا غیر جانبدارانہ و وتواجہ ادارہ نا حیثیت برقرار سلک ۔ مرکزی بینک انا وتواجہی آ ہچ ءُ سمجھوتہ اس کننگ پننگ ءِ ، گورنر اسٹیٹ بینک تون رابطہ مسنے ولے دابابت آن میکنزم ءِ گچین جوڑ کننگ نا گرج ءِ۔ اوپارے کہ اسٹیٹ بینک و وزارت خزانہ نا نیام اٹ رابطہ نا میکنزم اس جوڑ کننگ انگ ءِ۔ وزیر خزانہ نا پاننگ ئس کہ ملکی برآمد آک ودنگ ءُ و نسخان کم مننگ ءِ ، داڑے ہچ وڑنا ہیجانی کیفیت اس اف، ملک اٹی زوت بھلو زرکاری اس بریک، معیشت نا غٹ ٹک آک گچینی نا کنڈاروان ءُ و معاشی حالیت آتا بابت غلط فہمی تالان کننگ آن بایدے پاناد کروئی مرے۔ وزیر خزانہ اسد عمر پارے کہ کرتارپور بارڈ ءِ ملنگ بھاز جوان ءُ گام اس ئس ، داڑآ پاکستان بھارت تون مثبت ورندی نا اومیت تخک۔ ہڑتوم آ ملک آتا نیام اٹ بے چیٹی و سیاسی جھیڑہ غاتے چٹفنگ کن جتا سجفوئی مریک۔ اسدعمر پارے کہ اومیت ءِ کہ سارک انا کہول آ کمکاری آخبت اٹی سویلی ایشیا نا ڈیہہ ءِ سوگو کیک۔ کانفرنس اٹی بھارت نا بشخ ہلپننگ است ہسونی اسے۔ ہڑتوم آ ملک آتے ویل آتا آؤٹ آف باکس ایسر اس سجفوئی تمک۔ اوعلاقائی واپار ءِ مون آ دننگ نا گرج آ زور شاغسا پارے کہ داوڑ نن تینا الس نا گرج آتے پورو کرسا نیزگاری ٹی کمتی اتنگ کینہ۔ وزیر خزانہ پارے کہ سویلی ایشیا ٹی انرجی لنک آ کاریم بایدے کاریم مرے۔ دودآن ایمبیسیڈر شفقت کاکا خیل، ایگزیکٹو ڈائریکٹر ایس ڈی پی آئی عابد سلہری، یو این ای ایس سی اے پی ، بھارت آن ڈاکٹر نگیش کمار و ڈبلیو ٹی او نا نمائندہ رتناکر ادہیکری ئسک ہم تران کریر۔
