پاکستان و مراکش نا اقتصادی، تعلیمی و راجی بشخ آتے ٹی تین پہ تینی کمک ءِ مون آ دننگ آ امنا
اسلام آباد۔ 04دسمبر (اے پی پی) پاکستان و مراکش دا ہیت آ امنا کرینو کہ ہڑتوم آ ملک آک اقتصادی، تعلیمی و راجی بشخ آتے ٹی تین پہ تینی کمکاری ءِ مون آ دننگ تون اوار اوار پارلیمانی کہول آ ہم رابطہ غاتے پین سوگو جوڑ کیرہ۔ سے شنبے نادے پاکستان اٹی مراکش نا سفیر محمد کارموڈپٹی چیئرمین سلیم مانڈوی والا تون پارلیمنٹ ہاؤس اٹی اوڑدہی کرے۔ مراکش نا سفیر تون ہیت وگپ کرسا ڈپٹی چیئرمین سینیٹ پارے کہ پاکستان و مراکش چندی جہانی و علاقائی معاملہ غاتیا اسہ وڑ موقف تخرہ و ہڑتوم آ ملک آک مدام اسہ ایلو نا جتا علاقائی فورم تتون تفینو۔ اوپارے کہ ہڑتوم آ ملک آتے تین پہ تینی فائدہ غاتا رداٹ اقتصادی ، تعلیمی ، راجی و ٹوررازم نا بشخ آتے ٹی اسہ ایلو تون پین کمکاری ءِ مون آ دننگ کن گام گیج بایدے چست کروئی مرے۔ پارلیمانی ڈل آتا ہن و بر اٹی ہڑتوم آ کنڈآتا تعلقداری و اقتصادی رابطہ غاتے پین سوگوی تننگ مریک۔ اوپارے کہ مراکش پاکستان آن تعلیم و تربیت تون اوار ایلو کیہی بشخ آتے ٹی کمک دوئی کننگ کیک۔ پاکستان و مراکش ٹوررازم ، تعلیم، لائیو اسٹاک و ڈیری ڈویلپمنٹ نا بشخ آتے ٹی کمک و تین پہ تینی تعلقداری تے پین سوگو جوڑ کننگ کیرہ۔ ہڑتوم آ ملک آتا پوریاگر برادری نا نیام اٹ رابطہ غاتے مربوط جوڑ کننگ کن واضح گام گیج نا گرج ءِ تانکہ او تین پہ تینی فائدہ غاتا بشخ آتے ٹی سازگار چاگڑد اٹی زرکاری کننگ کیر۔ مراکش نا سفیر ڈپٹی چیئرمین سینیٹ نا کنڈان غیر سگالی نا جوزہ غاتا درشانی آ منت واری ءِ ہرفے و چندی بشخ آتے ٹی تین پہ تینی کمکاری ءِ مون آ دننگ نا بابت اونا خیال آتیان پورو امنا کرے۔ داوخت آ سینیٹر ساجد حسین طوری و سینیٹر محمد جاوید عباسی ئسک ہم ساڑی ئسر۔
