اسلام آباد۔ 04دسمبر (اے پی پی) بنجائی وزیر قومی ہیلتھ سروسز عامر محمود کیانی پارینے کہ جان جوڑی نا آب اٹی گچینی اتنگ ننا اولیت ءِ، پاکستان نا جا ن جوڑی نا بشخ اٹی اگہ گڑاس گچینی بسنے ولے 2030 ء اسکان جان جوڑی نا ہدف آتا دوئی کننگ کن کوشست کننگ نا گرج ءِ انتئے کہ ہراتم نن حکومت ءِ سنبھالان تو ننے معلوم مس کہ بھلو بھلو چیلنج و مشکل آک مون تروک ءُ ، جان جوڑی نا نظام اٹی بھلو خامی ارے و الس کن دوئی آسراتی و گرج آتے ٹی بھلو پرخ اسے وخت اس کہ وزیراعظم جان جوڑی نا بشخ آ چکار کننگ ءِ۔ داہیت ءِ او ہیلتھ سروسز اکیڈمی ٹی 9 می پبلک ہیلتھ کانفرنس آن تران کرسا پارے۔ اوپارے کہ جان جوڑی نا اسہ وڑنا آسراتی تا فراوانی نا ہدف آتا دوئی و ہیلتھ کارڈز و انشورنس پروگرام نا کمک اٹ مچ آ پاکستان ءِ جان جوڑی نا آسراتی تا فراوانی ننا اولیت آتے ٹی اوار ءِ۔ وخت اس کہ مچ آ ملک اٹی رکھی ٹیکہ غاتا کوریج و اونا آب اٹی گچینی اتنگ خوانہ تانکہ مچ آ قوم انا جان جوڑی نا آب ءِ گچین جوڑ کننگ مرے۔ اوپارے کہ تولیدی جان جوڑی ، زچہ و بچہ و نوائیدہ نا جان جوڑی ٹی گچینی اتنگ، ڈٹ بندی و ادارہ جاتی وڑاٹ ڈیلیور کننگ آ پبی چکار کننگ انگ ءِ۔ بنجائی وزیر جان جوڑی پارے کہ اسلام آباد اٹی مسہ بھلو ہسپتال بروک آ منہ تُو اٹی جوڑ کننگ انگ ءِ و بنجائی دارالحکومت اٹی جان جوڑی نا ماڈل ہند ن ءُ نظام اس اتنگ خوانہ ہراٹی طبی درمان نا مربوط آسراتی فراوان کننگک۔ اوکانفرنس نا چاہندار آتیا زور شاغا کہ وخت انا گرج ءِ کہ جان جوڑی نا قومی و جہانی ہدف آتے پورو کننگ کن تینا کڑد ءِ ادا کیر و ای خواوہ کہ ہیلتھ سروسز اکیڈمی جان جوڑی ٹی استعداد سازی نا عمل ءِ برجاتخنگے۔ وخت اس کہ اکیڈمی ءِ اپ گریڈکننگ نا چرجوئی ٹی پوسکن آ ودکی پلان وزارت ءِ گدریفنگ نا مست آن ہی پارت کننگانے۔
