اسلام آباد۔ 04دسمبر (اے پی پی) وزیر خارجہ شاہ محمود قریشی پارینے کہ اقتصادی کمکار تنظیم غٹ باسک ریاست آتا نیام اٹ تین پہ تینی رابطہ و کمکاری نا اہم ءُ ذریعہ اسے ، پائیدار اقتصادی شونداری نا ہدف آتا دوئی کننگ نا خاطر غٹ باسک ملک آتا نیام اٹ علاقائی و جہانی کہول آ کمکاری ءِ ودفنگ کن پاکستان تینا پبی کڑد ءِ ادا کرسا کیک۔ تین پہ تینی کمک و واپار ءِ مون آ دننگ کن غٹ باسک ریاست آک امنا ءُ۔ اوداہیت ءِ سے شنبے نادے داڑے وزارت خارجہ ٹی اقتصادی کمکار تنظیم نا دے انا بابت اڈ ہلوک آ دود آن تران کرسا پارے۔ دود اٹی اقتصادی کمکار تنظیم نا باسک ملک آتا سفیر و مندوبین آک بشخ ہلکر۔ وزیر خارجہ اقتصادی کمکار تنظیم نا دے انا دود اٹی ساڑی باسک ملک آتا سفیر ، نمائندہ و مندوبین آتے بخیر اٹ پارسا پارے کہ پاکستان گدرینگوک آ سال اولیکو وار ای سی او د ے ءِ اڈ تس و داسہ نن دادے ءِ سالانہ بنداو تیا باقاعدگی اٹ اڈ ترسا کینہ۔ اوپارے کہ اقتصادی کمکار نا تنظیم غٹ باسک ریاست آتا نیام اٹ تین پہ تینی رابطہ و کمکاری نا اہم ءُ ذریعہ اسے۔ تین پہ تینی واپار ءِ مون آ دننگ کن ریل، روڈزو بندرگاہ تون اوار اوار پوسکن آ ٹیکنالوجی نا کمک اٹ رابطہ غاتے ودفنگ مریک۔ اوپارے کہ ای سی او ٹی علاقائی امن و شونداری ءِ غٹ آن زیات اہمیت تننگ انگ ءِ ہرا دور جدید نا اسہ اہم ءُ گرج اسے ، تین پہ تینی کمک و واپار ءِ مون آ دننگ کن غٹ باسک ریاست آک امنا ءُ۔ اوپارے کہ باسک ریاست آک اواری اٹ جہانی ویل آتا سدباب ءِ کروئی ءِ۔ داسہ دا اسیجا زمواری ءِ کہ دا غٹ مسخت آتے دوئی کین ہراکہ اولی دے آن اقتصادی کمکار تنظیم نا بنداوی فریم ورک اٹی اوار ءُ۔ گرج داہیت انا ءِ کہ ہند ن ءُ گام گیج کننگے ہرافتیان جتا کہول آ باسک ملک آتا الس نا نیام اٹ رابطہ و کمکاری ءِ ہم ودفنگے۔ وزیر خارجہ پارے کہ ای سی او اسہ ہندن ءُ بلاک اسے ہرا جغرافیائی لحاظ اٹ دیکی و سویلی ایشیا غٹ ءِ یکجا کیک۔ ای سی او ملک آک قدرتی وسیلہ غاتیان مالامال ءُ ، پائیدار اقتصادی شونداری نا ہدف آتا دوئی کننگ نا خاطر غٹ باسک ملک آتا نیام اٹ علاقائی و جہانی کہول آ کمکاری ءِ ودفنگ کن پاکستان تینا پبی کڑد ءِ ادا کرسا کیک۔
