اسلام آباد۔ 04دسمبر (اے پی پی) بنجائی وزیر ریلوے شیخ رشید احمد پارینے کہ ڈاکٹرآک انسانیت نا خذمت ءِ کننگ نا بناآ عظیم ءُ خلقت ءُ۔ ڈگری آن زیات خواری و خلوص اٹ انسانیت نا خذمت ءِ کننگ ڈاکٹر آتے کن شرف نا سوب ءِ۔ پیشن نا ملک اٹی رہینگوک پاکستانی ڈاکٹر آک تینا ملک انا سفیر ءُ و ہموڑے اوفتا بے حد شرف ءِ کننگک۔ اوفک تینا گچین ساکھ اٹ جہانی کہول آ پاکستان نا پن ءِ روشن کریر۔ کالج آف فزیشنز اینڈ سرجنز نا 52می کانووکیشن آن تران کرسا شیخ رشید احمد پارے کہ اودے خوشی ءِ کہ او بھاز معبر خلقت تون مخا طب ءِ و اومیت کینہ کہ تینا تعلیم ءِ پورو کروک آ ڈاکٹر آک خواری ، لگن و خلوص اٹ انسانیت نا خذمت ءِ کیرہ۔ اوپارے کہ خواری کروک آتے اللہ اونا اجر ءِ ضرور ایتک۔ اللہ تعالیٰ اوفتا کمک ءِ کیک ہرا تینا کمک ءِ تینٹ کیرہ۔ اوپارے کہ پاکستانی ڈاکٹر آتا مچ آ دنیا ٹی شرف ءِ کننگک ہرااوفتا کسبی مہارت، خواری و لگن نا نتیجہ ءِ۔ اوپارے کہ اینو داڑے 4سد آن زیات ڈاکٹر ڈگری ہلسا اسپیشلسٹ ڈاکٹر جوڑ مسنو ننے اومیت ءِ کہ او است اٹ تینا ڈیوٹی ءِ پورو کیرہ۔ نما اصل مسخت نیزگار و مسکین خلقت نا خذمت بایدے مرے۔ نمے تینا خواری اٹ قوم انا خذمت ءِ کروئی ءِ۔ اوپارے کہ اونا دا ایمان ءِ کہ ہرا خلقت تون پیار کیک ، اللہ تعالیٰ اوڑتون پیار کیک۔ اوپارے کہ چنکی ٹی چائلڈ لیبر مسنوٹ و لال حویلی نا پد کتاب سودا کریٹہ۔ 17 سال انا وئی ٹی 18 گھنٹہ کاریم کریٹہ۔ ای کونسلر نا گچین کاری آن تینا سیاست نا بناءِ کریٹ و ہندا لال حویلی ٹی رہینگسا ہشت وار بنجائی وزیر مسٹ۔ ای گریجویشن و ماسٹر جیل اٹی کریٹ، کنکن دا شرف نا ہیت اسے کہ ای نم کون آ معبر خلقت نا دود اٹی نم تون مخاطب اُٹ۔
