اسلا م آباد۔ 03 دسمبر (اے پی پی) بنجائی وزیر تعلیم و کسبی تربیت شفقت محمود پارینے کہ ملک اٹی ماڑی تا جوڑ کننگ اٹی خصوصی بندغ آتا آسراتی ءِ مون آ تخنگ نا گرج ءِ ، ہر شار اٹی سائن لینگویج نا تربیت نا پروگرام درستی راستی کرفنگ کن گام گیج کننگک، دوشنبے نادے او ڈائریکٹوریٹ جنرل آف اسپیشل ایجوکیشن نا کنڈان معذور بندغ آتا جہانی دے انا بابت پاکستان نیشنل کونسل آف آرٹس اٹی اڈ ہلوک آ دود آن تران کریکہ۔ شفقت محمود پارے کہ کنے دا دود اٹی بشخ ہلسا بے کچ خوشی مننگ ءِ ، راج انا آب اٹی گچینی اتوئی ءِ تو ننے خصوصی بندغ آتون تینا برتاؤ ٹی گچینی اتوئی مریک۔ اوپارے کہ ننا ملک ویل آتون تموک ءِ ولے دانا دامطلب اف کہ نن دا خصوصی بندغ آتا بارواٹی تینا فرض ءِ گیرام کین۔ اوپارے کہ خصوصی بندغ آتا ادارہ غاتے ٹی کاریم کروک آ بندغ قدر انا قابل ءُ انتئے کہ او بیرہ اسہ نوکری اس کننگ افس، ہرااست اٹی درد تخک ہمو دا چناتون کاریم کننگ کیک۔ شفقت محمود پارے کہ ننے داسکان بھاز آ کاریم تے کروئی ءِ ، پاکستان اٹی ہندن ءُ ماڑی جوڑ کننگ نا گرج ءِ ہراڑے خصوصی بندغ آتے کن آسراتی ساڑی مرے۔ اوپارے کہ اگہ نن خصوصی بندغ آتے آسراتی ایتینہ تو او جوان وڑاٹ راج اٹی تینا اہمیت ءِ تالان کننگ کیرہ و راج انا کاریمی شاری نا وڑاٹ مون آ بریرہ۔ اوپارے کہ حکومت داڑکن خصوصی گام گیج کننگ ءِ ، ملک انا ہر شار اٹی سائن لینگویج نا تربیتی پروگرام بناکننگک۔ اوپارے کہ ننا وزارت خصوصی چناتے کن جتا گام گیج کننگ ءِ ہراٹی اوفتا تعلیم و تربیت ءِ المی جوڑ کننگ اوار ءِ۔ اوپارے کہ او خصوصی بندغ آتے کن کاریم کننگ ءِ تینا مشن سرپند کیک و ہراوخت اسکان حکومت ارے اوفتے کن کاریم کرسا کینہ۔ اوپارے کہ گدرینگوک آ دور تے ٹی تعلیم ءِ داخہ اہمیت تننگتو ہرانا سوب آن پاکستان دنیا نا ایلو ملک آتیان بھاز پدی سلیسونے ۔ ننا حکومت تعلیم ءِ مون آ دننگ آ خصوصی چکار تننگ ءِ و ملک انا شونداری نا ہندا اسٹ انگا کسر ءِ۔ داوخت آ ڈائریکٹر جنرل اسپیشل ایجوکیشن عشرت محمود تینا ادارہ نا کنڈان خصوصی چناتے کن کروک آ گام گیج آتے مون آ تخا۔ اوپارے کہ او تینا ادارہ ٹی اسہ مشن اسے نا وڑاٹ کاریم کننگ ءِ ، ننا کوشست مریک کہ چندی معذوری نا گواچی چناتا گچین وڑاٹ پرورش تون اوار اوار تربیت ءِ ہم کننگ کین تانکہ اوفتا مو ن نا زند ءِ گچین جوڑ کننگ مرے۔ اوپارے کہ ننا ادارہ ٹی بروک آ چناتے ٹی گچینی نا کچ 70 درسد اسکان ءِ و او عملی زند اٹی پبی بشخ ہلنگ نا قابل مریرہ۔ داکان مست چناک ٹیبلو شوو ملی نغمہ ہم پیش کریر ۔ دود اٹی سرٹیفکیٹس ہم بشخ وپانٹ کننگا۔
