حکومت خصوصی بندغ آتے کن آسانی ودی کننگ کن المی کانودسازی کن تیار ءِ
اسلام آباد۔ 03دسمبر (اے پی پی) وزیراعظم عمران خان معذور بندغ آتے تعلیم و روزگار نا اسہ وڑ وارخواہی تا فراوانی نا کمک اٹ اوفتا زند اٹی گچینی اتنگ نا حکومتی عزم انا اعادہ ءِ کرینے۔ دوشنبے نادے تینا ٹویٹ اٹی وزیراعظم پارے کہ حکومت خصوصی بندغ آتا کسر اٹی بروک آ اڑاند آتے مر و اوفتے کن آسانی ودی کننگ کن المی کانود سازی کن ہم تیار ءِ۔ اوپارے کہ معذور بندغ آتا جہانی دے انا وخت آ ای خصوصی بندغ آتے اسہ وڑ نا وارخواہی و روزگار پیش کرسا اوفتا زند ءِ بدل کننگ نا حکومتی عزم انا اعادہ ءِ کننگ خواوہ ۔ خصوصی بندغ آتے بااختیار جوڑ کننگ و داچرجوئی ٹی غٹ اڑاند آتے مر کننگ نا بابت ننا بل تیار ءِ۔ یات سلے کہ معذور بندغ آتا جہانی دے ءِ پاکستان تون اوار مچ آ دنیا ٹی دوشنبے نادے آ اڈتننگ انگ ءِ۔ دادے ءِ اڈتننگ نا مسخت معذور بندغ آتا حق و شرحالی ءِ مون آ دننگ نا ءِ ۔
