اسلام آباد۔ 03دسمبر (اے پی پی) بنجائی وزیر ڈٹ بندی ، شونداری و اصلاحات مخدوم خسرو بختیار پارینے کہ پاکستان وژن 2025ء نا رداٹ ورناچین ءِ تعلیمی انقلاب نا کمک اٹ گچین ءُ آخبت اس تننگ بنجائی حکومت نا اولی مشن ءِ، ساڑی حکومت ہندی کہول آ بڑزکوتعلیمی ادارہ غاتا اسہ نیٹ ورک اس جوڑ کرسا السی آسراتی تے ٹی ودکی نا کسر آ روان ءِ، وژن 2025ء ٹی تعلیمی شونداری ءِ اولی حیثیت تننگانے و پاکستان نا غٹ ضلع غاتا کہول آ یونیورسٹی سب کیمپس آتا جوڑ کننگ علاقائی شونداری نا کسر آ اسہ اہم ءُ گام اس ثابت مریک ، مچ آ ملک اٹی تعلیم نا بشخ ءِ گچین جوڑ کننگ کن ساڑی حکومت ملک اٹی اسہ وڑ نصاب رائج کننگ آ عمل کننگ اٹی ءِ۔ داخیال آتا درشانی ءِ او تدوک آدے سنٹرل ڈویلپمنٹ ورکنگ پارٹی نا دیوان آن تران کرسا کرے۔ دیوان اٹی بنجائی وزارت و صوبائی محکمہ غاتا بڑزکو کمامدارآک ساڑی ئسر۔ دیوان اٹی تعلیم ، ذرائع ابلاغ و علاقائی شونداری نا بابت ڈٹ پیش کننگا۔ سی ڈی ڈبلیو پی نا دیوان اٹی ایجوکیشن ڈویژن نا کنڈان 2 ڈٹ پیش کننگا، ہراٹی اولیکو ڈٹ پائیدار شونداری نا مسخت آتا دوئی کننگ کن بنجائی دارالحکومت ، گلگت بلتستان ، فاٹا و آزاد کشمیر نا ہندی کمیونٹی ءِ بنداوی تعلیم نا آسراتی تننگ و تعلیمی بشخ انا بابت انسانی شونداری نا انڈیکیٹرز آتے گچین جوڑ کننگ اٹ کمک فراوان کننگ کن 2 ار ب 60 کروڑ روپئی جتا کننگاہرادے دیوان اٹی منظور کننگا۔ مچ آ ملک اٹی بنداوی تعلیمی اسکول آتا جوڑ کننگ کن ایجوکیشن ڈویژن نا کنڈان 4ارب 5کروڑ 7 لکھ روپئی نا خڑچ انا ڈٹ پیش کننگا ہرادے مستی منظوری کن ایکنک آ گدریفنگا۔
