خراج پالیسی ءِ ریونیو ایڈمنسٹریشن آن جتا کننگ، مالیاتی نسخان نا مون ءِ توننگ و خڑچ و کٹیا تے بجٹ تخمینہ غاتا تہٹی تخنگ کن سخت مالیاتی ڈسپلن برقرار تخنگ نا عزم
پاکستان براڈ کاسٹنگ کارپوریشن ءِ ریلیف تننگ کن 400 ملین روپئی نا ٹیکنیکل سپلمنٹری گرانٹ تننگ نا فیصلہ
اسلام آباد۔ 29 نومبر (اے پی پی) وزیراعظم عمران خان پارینے کہ اسہ ہم سرکاری ملازم اسے نوکری تیان کشنگپ، شوگر مل آتا ویل آتا ایسری نا عمل اٹی گنڈیری نا کشارگر آتا فائدہ غاتارکھ ءِ المی جوڑ کننگک۔ او پنچ شنبے نادے بنجائی کابینہ نا دیوان نا کماشی ءِ کریکہ۔ بنجائی کابینہ فیصلہ کرے کہ پاکستان تحریک انصاف نا منشور نا رداٹ خراج پالیسی ءِ ریونیو ایڈمنسٹریشن آن جتا کننگک دا چرجوئی ٹی کانودی و تکنیکی معاملہ غاتے طے کننگ کن کمیٹی اس جوڑ کننگا۔ کابینہ مالیاتی نسخان نا مون ءِ توننگ و خڑچ و کٹیا تے بجٹ تخمینہ نا تہٹی تخنگ کن سخت مالیاتی ڈسپلن ءِ برقرار تخنگ نا عزم ءِ ظاہر کرے۔ دیوان پاکستان براڈ کاسٹنگ کارپوریشن نا مالیاتی مشکل خاص کر ملازم آتے پنداوڑی و پنشن تا دوئی کننگ اٹ مون تروک ویل آتا جاچ ءِ ہلسا ادارہ ءِ ریلیف تننگ کن 400 ملین روپئی نا ٹیکنیکل سپلمنٹری گرانٹ تننگ نا فیصلہ کرے۔ داچرجوئی ٹی کابینہ ادارہ نا مالی سوگوی کن سخت مالیاتی ڈسپلن اس اختیار کننگ و کٹیا تے ٹی ودکی ءِ المی جوڑ کننگ کن جامع ڈٹ اس تیار کننگ نا گرج آ زور شاغا۔ کابینہ نا دیوان اٹی ملک اٹی سرپلس بورہ نا دستیابی و کشار گرآتے ادائیگی تے ٹی ہرے نا معاملہ نا ہم سرجم جاچ ءِ ہلک۔ داچرجوئی ٹی فیصلہ کننگا کہ معاملہ ءِ سرجم غور و خوص و ویل ءِ اولیت بنداو آ عمل نا قابل ایسری کن اودے کابینہ نا اقتصادی رابطہ کمیٹی آ گدریفنگے۔ وزیراعظم دا عزم انا اعادہ ءِ کرے کہ شوگر مل آتا ویل انا ایسری ٹی گنڈیری نا کشار گر آتا فائدہ غاتا رکھ ءِ المی جوڑ کننگک۔ بنجائی کابینہ شہید ذوالفقارعلی بھٹو میڈیکل یونیورسٹی اسلام آباد نا وائس چانسلر نا تقرری کن سرچ کمیٹی اسے نا پوسکن ٹہیفنگ نا منظوری ءِ تس۔ داکمیٹی نا سرکڑدہ ہی ءِ وزارت انسانی حق انا بنجائی وزیر شیریں مزاری کیک۔ کابینہ عائلہ ماجد، غیاث الدین احمد حامد علی خان نا بحیثیت ڈائریکٹر ز سینٹرل پاور پرچیزنگ ایجنسی (گارنٹی ) لمیٹڈ تقرری ءِ کننگ نا ہم منظوری ءِ تس۔ داکان بیدس بنجائی کابینہ مالی سال 2018-19 ء ٹی پاک فوج سیم آ باڑ و لیٹ خلنگ نا ڈٹ اکن 20 ارب روپئی جاری کننگ نامنظوری ءِ ہم تس۔ داوخت آ بنجائی کابینہ اقتصادی رابطہ کمیٹی نا 22نومبر نا دیوان نا فیصلہ غاتے پک کرے ۔ ای سی سی نا ہرافیصلہ غاتے پک کننگا اوفتے ٹی پاکستان سٹیل مل آتا کزیت کروک آ ملازم آتا وارث آتے پرویڈنٹ فنڈ، گریجویٹی و پے رول انا ادائیگی ، یخ انا موسم اٹی قدرتی گیس انا لوڈمینجمنٹ وسرکاری بشخ انا ودکی خولم ، پولٹری ایسوسی ایشن آف پاکستان ءِ جاری کننگ اوار ءِ۔
