اسلام آباد۔ 29 نومبر (اے پی پی) وسل بلوئر پروٹیکشن اینڈ ویجی لینس کمیشن بل 2018 ء نا مسودہ ءِ منظوری کن زوت بنجائی کابینہ ٹی اوار کننگک۔ وزارت کانود و انصاف وزیراعظم نا 100 دے ئی ایجنڈا نا رداٹ ہندا بل انا مسودہ ءِ پورو دروشم تسنے۔ اے پی پی ءِ دوئی دستاویز آتا رداٹ دابل انا منظوری آن پد وڈی خوری نا بابت آزاد کمیشن ءِ معلومدار ی فراوان کننگ مریک۔ ہندا کمیشن دوئی معلومداری تا بنداو آ منی لانڈرنگ و وڈی خوری نا بابت غاو تے نیب، ایف آئی اے ، ایس ای سی پی، بنجائی و صوبائی اینٹی کرپشن نا محکمہ غاتے گدریفک۔ ہندا کانود نا رداٹ کمیشن معلومداری فراوان کروک آ بندغ نا پن ءِ صیغہ راز اٹی تخک و تعلقدار ادارہ ٹی تینٹ مدہی مریک۔ معلومداری تروک آ بندغ نا پن ءِ صیغہ راز اٹی تخنگ نا مسخت اونا رکھ ءِ المی جوڑ کروئی ءِ ولے کیس اسے ٹی وسل بلوئر نا رداٹ تروک آ معلومداری تیا ریکوری نا دروشم اٹ ہندا بندغ ءِ 20 درسد پیسہ ملک ولے اسٹ آن زیات بندغ نا معلومداری تیا ریکوری نا حالیت اٹ جم اٹنگا پیسہ غاتا 20 درسد پیسہ معلومداری تروک آ غٹ بندغ آتے ٹی بریبر وڑاٹ بشخ وپانٹ کننگک۔ داکانود نا رداٹ غاو تروک آئے نوکری آن برخواست کننگ، انضباطی کارروائی و دھڑکو تیان رکھ فراوان کننگ ناءِ۔ دروغ انا احوال آتیا 2سال قید، 2لکھ جرمانہ یا ہڑتوم آ سزاتے تننگک۔ وزارت کانود و انصاف نا کمامدارآک اے پی پی ءِ پاریر کہ وسل بلوئر پروٹیکشن اینڈ ویجی لینس کمیشن بل 2018 ء نا سلاہ ئی مسودہ ءِ حتمی دروشم تسنے و اودے منظوری کن زوت بنجائی کابینہ ٹی پیش کننگک۔
