کرتارپور، نارووال۔ 28 نومبر (اے پی پی) مزن وزیر عمران خان ءَ اے جزم ءِ درشان کت کہ پڑ ءَ ایمنی ءِ واستہ بھارت اگاں یک گام ءِ دیم ءَ بجنت گڈا پاکستان دو گام جنت، ما بھارت ءِ گوما دوستیی، مھکمیں ءُُ نیک راھی دوستی لوٹاں، گوست ءِ سانکل آناں پروشان ءَ دیم ءَ روان، دوئیں ملک آنی نیام ءَ بنیاتی جیڈھ کشمیر اِنت ءُُ دوئیں ملک آنی سروک آنی زانت ءُُ سسا ءَ چہ اے جیڈھ گیوار بوت کنت، ایمنی ءِ واستہ پاکستان ءِ حکومت ، سیاسی گل، اُرد ءُُ توامیں ادارگ یکیں لائن ءَ اوشتاتگ آں، کرتار پور ءَ را دور گند ءِ سر ءَ چاروکیں گوردوارہ دربار ءِ صاحب ءِ زیارت ءَ کت کن اَنت۔ سکھ برات ھمک رنگ ءِ آسراتی پُجارینگ بنت۔ آئی ءَ اے گپ سئے شمبے ءِ روچ ءَ کرتار پور کشک ءِ بُن ھشت ءِ ایر کنگ ءِ مراگش ءَ گوں گشتانک دیان ءَ کت۔ مراگش ءَ چیف آف آرمی سٹاف جنرل قمر جاوید باجوہ، سروزیر پنجاب سردار عثمان بزدار، گورنر پنجاب چودھری محمد سرور ، بُنجاھی وزیر اھوالکاری ءُُ شنگ کاری چوہدری فواد حسین ، وزیر ءِ درئی کار شاہ محمود قریشی ، وزیر مملکت برائے توکی کار شہریار آفر یدی، بنجاھی وزیر برائے نیک راھی کار نور الحق قادری، بُنجاھی ءُُ صوبائی وزیر ، بھارتی وزیر لوکل گورنمنٹ ، کلچرل ءُُ میوزیم نوجوت سنگھ سدھو ،بھارت ءِ وزیر ہرسمرت کور بادل، سکھ برادری ءِ باسک ءُُ ٹوھیں کارندہ ساڑی اتنت۔ مزن وزیر عمران خان ءَ مراگش ءَ بھر زوروکیں مردم ھاسیں رنگ ءَ سکھ کمیونٹی ءَ را وش اتک کت ءُُ گوشت کہ مرچی آ سکھ کمینونٹی ءِ باسک آنی دیم ءَ بچکند گندگ ءَ انت، ھمے وڑیں بچکند کہ یک مسلمان ءِ مدینہ ءَ چہ 4 کلومیٹر دور بہ بیت آ مدینہ ءَ شت نہ کنت ءُُ آئی ءَ را مدینہ ءَ روگ ءِ موہ اناگہ ءَ بہ رس ایت گڈا آ شات ءُُ گل بیت ، ھما بچکند ءُُ شاتی ءَ مرچی سکھ کمیونٹی ءِ باسک آنی دیم ءَ گند ءَ آں۔ مزن وزیر ءَ سکھ برات آناں دلگوش کت ءُُ تران کت کہ پاکستان ءِ حکومت دربار صاحب کرتار پور ءَ را گہتر ءَ چہ گہتر جوڑ کنگ ءِ گامگیج کنت اِنت ءُُ ادا یاترا ءِ واستہ آیوکیں مردم آناں گہتریں آسراتی دینت، آیوکیں سال ءَ بابا گرونانک ءِ 550 سالروچ ءَ مراگش ءِ موہ ءَ شما وھد ءِ اے جاھ ءَ چار اِت گڈا شمارا وشی بیت کہ اِدا ھمک رنگ ءِ آسراتی رس ایت۔ مزن وزیر ءَ سکھ زیارتی آں گوں تران کنان ءَ گوشت کہ آ ملک ءِ کجام ھم جاھ ءَ برونت ءُُ شمان گند اِت کہ الس شمارا چتور ءُُ چنکیاس دوست دار اَنت۔ مزن وزیر ءَ گوشت کہ منی دوست نوجوت سنگھ سدھو ءَ ھرچی کہ گپ جتگ من آئی ءَ چہ باز متاثر بوتگ آں، من ءَ سدھو ءِ کرکٹ کمنٹری ءُُ کرکٹ کیریئر ءِ زانت اِنت بلے صوفی کلام آنی تہءَ آئی ءِ زانتکاری ءُُ بلدکاری ءَ منی انوں بوتگ کہ آ باز زانت۔ مزن وزیر ءَ گوشت کہ آئی ءَ 21 سال ءَ کرکٹ لیب کتگ وھدیکہ آ 22 سال ءَ چہ سیاست ءِ پٹ ءَ اِنت۔ مزن وزیر ءَ مراگش ءَ استیں سکھ کمیونٹی ءَ گوں دلگوش کنان ءَ تران کت کہ ما آئی ءِ واستہ آسانی پیداک کناں ءُُ دورگند ءَ چہ اے دربار ءَ چاروک ادا بیا اَنت ءُُ اے دربار ءَ وتی چماں بچار اَنت۔ مزن وزیر ءَ گوشت کہ سئے ماہ ءَ پیسر نوجوت سنگھ سدھو پاکستان ءَ واتر وتی ملک ءَ شتگ گڈا بھارت ءَ آئی ءَ را بازیں ایرادگری ءَ گوں دیم پہ دیمی کنگ کپتگ، آئی ءَ گوشت کہ نوجوت سنگھ سدھو دو اینچیں ملک آنی دوستی ءِ گپ ءَ کنگ اِنت ھما کہ جوہری طاقت اَنت ایشانی نیام ءَ جنگ بوت نہ کنت چیا کہ دو ایٹمی طاقت ءِ نیام ءَ جنگ ءِ سسا ھم گنوکی اِت۔ مزن وزیر ءَ گوشت کہ پاکستان ءُُ بھارت ءِ نیام ءَ دوستی ءِ واستہ مارا سدھو ءِ مزن وزیر بوھگ ءِ ودار کنگ کپ ایت، لیڈر شپ ءِ سنچ بوھگ لوٹ ایت، بنی آدمی راجدپتر ءَ چہ مارا ھمے سبک رسیت اِچ چیز ناممکن نہ اِنت، مراگش ءِ ’’نظامت‘‘ ءِ زمہ واری سینیٹر فیصل جاوید ءَ کت اَنت۔
