سیکرٹری ہاؤسنگ وزیراعظم ءِ پوسکن آ پاکستان ہاؤسنگ پروگرام آپیش رفت نا بارواٹ معلومدار کرے
اسلام آباد۔ 28 نومبر (اے پی پی) وزیراعظم عمران خان پارینے کہ بروک آ 5سال اٹی 50 لکھ اُراتا جوڑ کننگ نا ڈٹ آن ہنکینی ویل آتے کم کننگ اٹ کمک رسینگک، وزارت ہاؤسنگ و تعمیرات دوئی انسانی وسیلہ غاتا پتی کاریم اٹ اتنگ ءِ المی جوڑ کننگ کن جامع ڈٹ اس تیار کے۔ اوداہیت ءِ چارشنبے نادے وزارت ہاؤسنگ و تعمیرات نا بارواٹی بریفنگ نا کماشی ءِ کرسا پارے۔ بنجائی وزیر ہاؤسنگ و تعمیرات چوہدری طارق بشیر چیمہ، سیکرٹری ہاؤسنگ ڈاکٹر عمران زیب و وزارت نا سینئر کمامدارآک بریفنگ اٹی ساڑی ئسر۔ سیکرٹری ہاؤسنگ وزیراعظم ءِ وزارت و اوڑتون گنڈوک محکمہ و ادارہ غاتا بارواٹ معلومدار کرے ہرافتے ٹی پاکستان پبلک ورکس ڈیپارٹمنٹ (پاک پی ڈبلیو ڈی)، سٹیٹ آفس، نیشنل ہاؤسنگ اتھارٹی، پاکستان ہاؤسنگ اتھارٹی، فیڈرل گورنمنٹ ایمپلائز ہاؤسنگ فاؤنڈیشن و نیشنل کنسٹرکشن لمیٹڈ(ای سی ایل ) اوار ءُ۔ اودارداٹ چندی ادارہ غاتا سرسہبی تیان ہم معلومدار کرے۔ وزیراعظم ءِ پاننگاکہ سرکاری ہنکین جاٹ آتا الاٹمنٹ نا عمل اٹی پورو شفافیت ءِ المی جوڑ کننگ کن پبی کوشست کننگ انگ ءِ وخت اس کہ غیر کانودی کوزہ گر آتیان سرکاری ہنکین جاٹ آتے خورک کرفنگ کن ہم کوشست آتے کاریم اٹ اتنگ انگ ءِ۔ وزیراعظم ءِ پاننگاکہ داوخت وزارت ہاؤسنگ نا چندی اسٹیشن آتیا 26ہزار 700 یونٹ آتا کمتی نا مون تروک ءِ۔ اوپاک پی ڈبلیو ڈی و وزارت نا ایلو محکمہ غاتا بابت چندی معاملہ غاتے ہم تالان کرے۔ داوخت آ وزیراعظم پارے کہ حکومت ہنکینی بشخ خاص کر بنجائی دارالحکومت و صوبائی ہیڈ کوارٹر آتے ٹی ملازم آتے سرکاری ہنکین جاٹ آتا فراوانی نا بابت مون تروک ویل آتیان آگاہ ءِ۔ اوپارے کہ پی ٹی آئی حکومت نا بروک آ پنچ سال اٹی 50 لکھ اُراتا جوڑ کننگ نا شاندار ڈٹ آن سرکاری ہنکین جاٹ آتا کمتی نا ویل ءِ مر کننگ اٹ کمک رسینگک۔ اووزارت نا چندی محکمہ غاتے ٹی انسانی وسیلہ و دوئی مہارت آتا کچ آن کم کاریم اٹ اتنگ آ گڑتی نا درشانی ءِ کرے و پارت کرے کہ دوئی انسانی وسیلہ غاتا پبی کاریم اٹ اتنگ ءِ المی جوڑ کننگ کن جامع ڈٹ اس بایدے جوڑ کروئی مرے۔ سیکرٹری ہاؤسنگ وزیراعظم ءِ پوسکن آ پاکستان ہاؤسنگ پروگرام آ پیش رفت نا بارواٹی معلومدار کرے۔ داپاننگاکہ پوسکن آ پاکستان ہاؤسنگ پروگرام نا بابت بولی دہندگان /کمپنی تیان است بڈ ردعمل ملنگ ءِ، 41بڈرز/کمپنیک درخواست تسنو و پاکستان نا بھلا شار تے ٹی پلاٹس/اپارٹمنٹس/اُراتے کن ڈغار نا پیش کش کرینو۔
