اسلام آباد۔ 28 نومبر (اے پی پی) وزیراعظم عمران خان پارینے کہ حکومت پاکستان اٹی گوازی تا معیار ءِ گچین جوڑ کننگ کن سنجیدہ ڈٹ تخک، پاکستانی گوازی گر تے اسہ وار ولدا جہانی کہول آ بڑزکو ہند اس المی جوڑ کننگ کن بے کچ موثر پالیسی اس اتیک، چارشنبے نادے پاکستان فٹ بال فیڈریشن نا صدارتی اومیت دار ، پنجاب فٹ بال کونسل نا باسک و تحریک انصاف نا باسک قومی اسمبلی ملک عامر ڈوگر وزیراعظم عمران خان تون داڑے اوڑدہی کرے و اودے معلومدار کرے کہ او دسمبر اٹی مروک آ پاکستان فٹ بال فیڈریشن نا گچین کاری تیٹی صدارت نا اومیت دار ءِ۔ وزیراعظم داہیت آ خوشی نا درشانی ءِ کرے کہ فٹ بال نا حقی جوزہ تخوک آ و داچیلنج ءِ ہرفنگ نا فیصلہ کرینے۔ وزیراعظم اوڑکن نیک است خواہی نا درشانی ءِ کرسا اودے یخین ترفے کہ حکومت پاکستان اٹی گوازی تا آب ءِ گچین جوڑ کننگ کن سنجیدہ ڈٹ اس تخک و زوت پاکستانی گوازی گرتے جہانی آب آ دُوار اتنگ کن گچین پالیسی اس المی جوڑ کیک۔ وزیراعظم پارے کہ پوسکن آ سپورٹس پالیسی ننا گوازی گر، کوچز و آفیشل آتا رکھ آخبت ءِ المی جوڑ کیک۔ ملک عامر ڈوگر ناخواست آ وزیراعظم فٹ بال نا گوازی گر ، کوچز، ریفری و آفیشل آتیا تالان ڈل اتون اوڑدہی آ رضامندی ظاہر کرے تانکہ پاکستان اٹی فٹ بال نا مون آ دننگ کن اودے بنائی معلومداری تیان معلومدار کننگے۔ ملک عامر ڈوگر نا خواست آ وزیراعظم فیفا و اے ایف سی نا صدر آتے پاکستان نا دورہ نا سلہ خلنگ و اوفتے تون زوت اوڑدہی آ رضامندی ظاہرکرے ۔ وزیراعظم ہراکہ تینٹ ہم اسہ عظیم ءُ گوازی گر اسے ، او سنجیدگی اٹ دا محسوس کیک کہ دا کہول آ ہیت وگپ آن فٹ بال ءِ مون آ دننگ رسینگک و ورلڈ گورننگ باڈیز و پاکستان فٹ بال فیڈریشن نا نیام اٹ گچین تعلقداری ودی مریک۔
