سیالکوٹ۔ 28 نومبر (اے پی پی) وزیراعظم عمران خان تعلیم نا اہمیت ءِ تالان کرسا پارینے کہ تعلیم نا بشخ اٹی زرکاری کروک آ قومک شونداری نا پڑاٹ مون آ کارہ، اقتصادی تنکی آن زوت پیش تمنہ و تعلیم نا بشخ آ غٹ آن زیات زرکاری کینہ، انفارمیشن ٹیکنالوجی نا بشخ آ پبی چکار کننگ نا گرج ءِ، ملک انا اصل زرکارآک ورناو چناک ءُ ہرافتے کن خصوصی چکار درکار ءِ، روڈ آتا فیتہ ءِ کاٹ کننگ نا جاگہ غا یونیورسٹی تا فیتہ ءِ کاٹ کننگ ءِ اولیت ایتیوہ۔ داخیال آتا درشانی ءِ او داڑے گورنمنٹ کالج ویمن یونیورسٹی سیالکوٹ نا علامہ اقبال نالج پارک کیمپس لدھڑ نا بنداو ءِ تخنگ نا دود آن تران کرسا کرے ۔ وزیراعظم تون اوار وزیر خارجہ شاہ محمود قریشی، بنجائی وزیر اطلاعات و نشریات فواد حسین چوہدری، وزیر مملکت داخلہ شہریار آفریدی، بنجائی وزیر ریلوے شیخ رشید احمد ، بنجائی وزیر مذہبی امور پیر نورالحق قادری، وزیراعظم نا خصوصی کمکار نعیم الحق، بنجائی وزیر شفقت محمود، وزیراعلیٰ پنجاب سردار عثمان بزدار ، مسکوہی بنجائی وزیر ڈاکٹر فردوس عاشق اعوان، تحریک انصاف پنجاب نا صدر عمر ڈار، صوبائی وزیر اسپیشل ایجوکیشن چوہدری محمد اخلاق و ایلوفک ساڑی ئسر۔ وزیراعظم عمران خان پارے کہ اسکول آن بناکروک آ ادارہ اینو یونیورسٹی اس جوڑ مسنے ، داچرجوئی ٹی کڑد ادا کروک آتے خراج تحسین پیش کیوہ۔ اوپارے کہ امریکہ ہرا شون ہلکونے او اونا یونیورسٹی تا مرہون منت ءِ، ہرا قومک تینا خلقت و اوفتا تعلیم آ چکار کیرہ او مون آ کارہ، شون ہلوک ملک علم آ مبنی معیشت نا بنداو آ ہی مون آ ہنانو۔ داوخت آ وزیراعظم سنگاپور نا مثال ءِ ترسا پارے کہ 20 آن 30 لکھ انا آبادی نا چنک انگا دا ملک انا برآمد آتا کچ 330 ارب ڈالر ءِ وخت اس کہ 21کروڑ نفوس نا آبادی آ تالان ننا ملک پاکستان نا برآمد آک بیرہ 24 ارب ڈالر نا ءُ۔ اوپارے کہ دا شونداری نا سوب دادے کہ سنگاپور نا اسہ یونیورسٹی نا بجٹ پاکستان نا غٹ یونیورسٹی تا بجٹ آن زیات ءِ۔ اوپارے کہ پاکستان اٹی خلقت و اوفتا تعلیم آ زرکاری آ چکار کننگتنے، داسہ ننے موقع ملانے تو دابشخ آ پبی چکار کینہ۔ وزیراعظم پارے کہ ہائر ایجوکیشن خاص کر انفارمیشن ٹیکنالوجی نا بشخ اٹی پوسکن پوسکن ءُ رجحان مون آ بننگ ءِ، مصنوعی ذہانت اٹ دنیا بدل مننگ ءِ، آئی ٹی نا بشخ اٹی ترندی اتون شونداری کن ہائر ایجوکیشن و مصنوعی ذہانت نا بشخ آتیا چکار کننگک۔ اوپارے کہ وسیلہ غاتا کمتی نا رداٹ ودوک آ آبادی اسہ بھلو ویل اسے ولے بڑزکو آبی تعلیم و ویلیو ایڈیشن نا حالیت اٹ ہندا آبادی ننا طاقت جوڑ مریک ہرا ملک ءِ مون آ دیک۔ اوپارے کہ دابھاز حیرانی نا ہیت اسے کہ سیالکوٹ کون آ شار اٹی دا اولیکو یونیورسٹی ءِ ، برصغیر اٹی ننا پدی سلنگ نا ہندا سوب ءِ کہ ننا ملک اٹی تعلیم نا بشخ و پوسکن آ چین آ زرکاری کننگتو۔ وزیراعظم پارے کہ دابناک ءُ ، نن مشکل حالیت آتے ٹی حکومت ءِ سنبھالانن، داسہ زیات وخت لگپک و نن داحالیت آتیان پیش تمنہ، وسیلہ غاتے ودسا کارہ تو تعلیم نا بشخ اٹی غٹ آن زیات زرکاری کینہ، نن ملک ءِ مون آ دینہ کانہ۔ وزیراعظم پارے کہ داسہ نن ملک انا سمت ءِ سہی کینہ، ورناو چناک ننا اصل سرمایہ غاک ءُ ہرافتے خصوصی چکار نا گرج ءِ، داوخت آ وائس چانسلر حافظ خلیل بیابخیری اس پیش کرے۔ وزیراعظم عمران خان یونیورسٹی نا سوزہ زار اٹی نیال اس ہم خلک۔ یات سلے کہ دوسد ایکڑ رقبہ غا محیط نیو کیمپس نا ماڑی آ اسہ ارب شست ءُ دو کروڑ بیست ءُ ہفت لکھ روپئی خڑچ بریک ۔ داوخت آ وائس چانسلر یونیورسٹی ڈاکٹر حافظ خلیل، مسکوہی وائس چانسلر ڈاکٹر فرحت سلیمی ، چیئرمین وزیراعظم یوتھ پروگرام عثمان ڈارئسک ہم تران کریر۔ داکان مست وزیراعظم عمران خان کرتارپور کوریڈور نا بنداو ءِ تخنگ کن بذریعہ جہاز سیالکوٹ انٹرنیشنل بالی پٹ آ سرمس تو صوبائی وزیر خصوصی تعلیم چوہدری محمد اخلاق، صوبائی صدر پی ٹی آئی عمرڈار، ڈائریکٹرز سیال، ڈپٹی کمشنر محمد طاہر وٹو، ڈسٹرکٹ پولیس آفیسر عبدالغفار قیصرانی ، چیئرمین سیالکوٹ انٹرنیشنل ایئر پورٹ ندیم انور قریشی، صدر سیالکوٹ ایوان صنعت و واپار مسعود اختر خواجہ، مسکوہی چیئرمین سیال انجینئر خاور انور خواجہ و اسسٹنٹ کمشنر عمران بشیر اودے بخیر کریر۔
