کرتارپور۔28نومبر(اے پی پی) مذہبی کارانی بنجاہی وزیر پیر نورالحق قادری ءَ گشتگ کہ پاکستان پہ اقلیت آں محفوظیں ملک اِت، کرتار پور گردوارہ ءَ را نوک تر کنگ بیت، بابا گرونانک ءِ 550می ودی روچءِ شاتکامی کنگ بیت ۔ چارشمبے ءِ روچءَ کرتار پورءَ راہداری ءِ بن اِشت ایر کنگی مراگشءَ گوں تران کنانءَ بنجاہی وزیر ءَ گشتگ کہ مرچی مہ راج دپتر ءِ یک مزنیں شخصیت بابا گرونانک دیو مہاراج ءِ یاتگارءَ ساڑی اَنت کہ اِدءَ آئیءَ زندءِ گڑی 11سال گوازینتگ، آئیءَ وتی زندءَ توحید، انسانیت ءُ بنی آدمءِ ازمت ءِ گپءَ بہ کن اَنت۔ کرتارپور راہداری ءِ بن اِشت ءَ چہ مرچی یک ہاسیں کارے بوہگءَ ایں۔ آئیءَ آرمی چیف جنرل قمر جاوید باجوہ ءُ پیسرگیں بھارتی کرکٹرنوجوت سنگھ سدھو ءَ مزن وزیر عمران خان ءِ سوگند چست کنگی مراگشءَ امباز ءِ گپ کتگ ءُ گشتگ کہ ایشی ءَ چہ جیڑہ گیش ءُ گیوار بنت ۔آئیءَ گشتگ کہ پاکستان پہ اقلیت اَں محفوظیں ملک اِت ءُ مزن وزیر عمران خان ءِ نوکیں پاکستان محفوظ تریں ۔ یک سالے ءَ پد بابا گرونانک ءِ 550می ودی روچ ءِ شاتکامی کنگ بیت، اے موہءَ پاکستانءِ حکومت ، راجءُ ریاست آ روچءَ پہ وشیءُ شاتکامی گوازینگءِ بندوبستءَ کنگءَ اِنت۔
