صدر مملکت عارف علوی دہ می جہانی دفاعی نمائش و سیمینار (آئیڈیاز 2018) نا بناءِ کرے
کراچی۔ 27 نومبر (اے پی پی) صدر مملکت عارف علوی دہ می جہانی دفاعی نمائش و سیمینار (آئیڈیاز 2018) نا بناءِ کرے۔ بنائی دود آن تران کرسا صدر مملکت داعزم انا درشانی ءِ کرے کہ پاکستان اٹی سلہہ غاتا پیداوار دفاعی مسخت آتے کن ءِ و مریک، ملکی سیم تا دفاع و انسداد دہشت گردی نا برخلاف پرعزم کوشست آتیا سلہہ بند فوج ءِ خراج تحسین پیش کرسا اوپارے کہ داچرجوئی ٹی جہانی برادری پاکستان نا قربانی تے بایدے گوجالپ۔ صدر عارف علوی پارے کہ ڈیہہ ٹی دہشت گردی و پڑوس اٹی بدامنی ننا ملک انا سیکورٹی ءِ براہ راست زہمی کرینے، داڑان اسہ لکھ پاکستانی تا جان زیان مس و قومی معیشت ءِ بھلو نسخان اس رسینگا ، داغٹ حالیت آتا باوجود پاکستان 1980ء آن بھلو کچ اسے ٹی مہاجر آتے پناہ تسنے۔ صدر مملکت پارے کہ دنیا ءِ ہمو حقائق آتے بایدے مون آتخوئی مرے و پاکستان ءِ انٹرنیشنل سپورٹ فنڈ آن اونا جاچ بشخ ءِ تروئی مرے۔ صدر مملکت ڈیہہ ٹی نزوری نا پیش نظر پاکستان نا سیکورٹی نا اہمیت ءِ تالان کرسا پارے کہ غذائی رکھ، اقتصادی سوگوی و الس نا راجی رکھ آ ہم بریبر چکار کننگ انگ ءِ۔ اوپارے کہ پاکستان جنگ انا مخ تف اف انتئے کہ جنگ آک بین و نیزگاری نا پیش خیمہ مریرہ۔ آئیڈیاز 2018 ء داراستکی نا عکاس ءِ کہ ننا سلہہ غاک دفاعی مسخت آتے کن ءُ ہرا ڈیہہ ٹی امن نا ضمانت ءُ۔ صدر عارف علوی پارے کہ سوگو دفاعی لائخیک ننا گرج آک ءُ تانکہ دنیا ءِ سما مننگ کے کہ پاکستان اسہ سوگو ءُ ملک اسے و تینا دفاع کن پرعزم ءِ۔ اوپارے کہ دا ڈیہہ تون اوار اوار مچ آ دنیا ٹی سیکورٹی نا تصور بدل مننگ ءِ و اودے پاکستان نا رداٹ پہہ مننگ نا گرج ءِ۔ اوپارے کہ نن دہشت گردی تون مون تسن و اونا مون ءِ تورین و داسہ نن راجی رکھ آ چکار کرینن۔ داچرجوئی ٹی خلقت نا روزگار، تعلیم، جان جوڑی و ایلو بنداوی گرج آتے پورو کننگ کن کوشست آک برجاءُ۔ داکان مست چیئرمین جوائنٹ چیفس آف اسٹاف کمیٹی جنرل زبیر محمود صدر مملکت نا خیرمقدمءِ کرے۔ داوخت آ بنجائی وزیر دفاعی پیداوار زبیدہ جلال ، گورنر سندھ عمران اسماعیل، میئر کراچی وسیم اختر و ایلو ملکی و درملکی پنی شخصیت آک ہم ساڑی ئسر۔
