اسلام آباد۔ 26نومبر (اے پی پی) بنجائی وزیر اطلاعات و نشریات چوہدری فواد حسین پارینے کہ کراچی ٹی چین نا قونصلیٹ آ جلہو اٹی پیشن نا قوت آک اوار ءُ، ننے سماءِ کہ جلہو دیر اس کرے و جلہو نا پد اٹ دیر ءِ، دا مچ آ دنیا چاہک ، دنیا داہم چاہک کہ پاکستان امن نا کنڈا ہِننگ ءِ و دیر اس امن خواپک، پاک چین تعلقداریک بھاز کڑمب ءُ ، دُن انگا واقعہ غاتیان تعلقداری تیا زہم تمپک، پاکستان نا فوج و کانود نافذ کروک آ ادارہ غاک امن کن قربانی تسنو، پاکستان نا مسڑ اے ایس پی، پولیس و سیکورٹی گارڈآک ہراوڑ اٹ چینی قونصلیٹ نا حفاظت ءِ کریر فخر انا قابل ءِ۔ اودوشنبے نادے داڑے چائنیز کمیونٹی نا کنڈان شہید پولیس آتا خاہوت آتے کن بناکروک آ فنڈریزنگ دود آن تران کریکہ۔ چین نا ڈپٹی ہیڈ آف مشن یاؤلی جین آن بیدس بنجائی دارالحکومت اٹی رہینگوک چائنیز زالبول، نرینہ، ورنا، طالب علم ، کاروبار تون گنڈوک چین نا شاری تا بھلو کچ اس داوخت آ ساڑی ئسر۔ دود آن تران کرسا بنجائی وزیر اطلاعات و نشریات چوہدری فواد حسین پارے کہ کراچی ٹی چینی قونصلیٹ آ جلہو اٹی دیر اوار ءِ غٹ ءِ سماءِ، چینی قونصلیٹ آ جلہو اٹی ہرا پیشن نا دواوار ءِ او ہم غٹ ءِ سماءِ۔ اوپارے کہ نن داوڑ نا مصیبت آتا مقابلہ ءِ کننگ چانہ، ایوب خان نا دورآن پاکستان و چین نا تعلقداریک ءُ اوکان پد ہر بروک آ حکومت تینا بشخ ءِ شاغا، چین اتون اسٹریٹجک تعلقداری تیان بیدس دفاعی و معاشی رشتہ ہم ارے ہرادنیا نا خن تیٹی سُرک، اوپارے کہ دہشت گردی نا برخلاف داخہ مریس جنگ انا باوجود پاکستانی قوم ثابت قدم و مستقل مزاجءِ۔ پاکستان صوفیاء و امن نا دھرتیءِ۔ اوپارے کہ پاکستانی قوم پنچ ہزار سال متکن آ تاریخ نا امین ءِ۔ اوپارے کہ پاکستان اٹی رہینگوک آ چائنیز کمیونٹی رضاکارانہ وڑاٹ کراچی قونصلیٹ شہید آتے کن فنڈریزنگ نا بست و بند ءِ کرینو، مچ آ دنیا ٹی رہینگوک چین آن تعلق تخوک آ شاریک فنڈریزنگ کننگ ءُ۔ اوپارے کہ پاکستان چین سنگتی ہر مشکل اٹی پورو سلیسنو، حکومت چین اتون بھاز خڑکی رشتہ ٹی تفوک ءِ۔ اوپارے کہ سیکورٹی فورس و الس اواری اٹ خلقت ءِ بشخ وپانٹ کننگ نا سازش ءِ بے سہب جوڑ کننگ ءُ۔ گچین سیکورٹی نا سوب آن دہشت گرد جلہو ءِ بے سہب جوڑ کننگا۔ چینی سفارت خانہ نا ڈپٹی ہیڈ آف مشن یاؤلی جین چینی قونصلیٹ نا سیکورٹی ءِ فول پروف جوڑ کننگ و دہشت گردی ءِ بے سہب جوڑ کننگ آ پاکستان نا حکومت نا منت واری ءِ ہرفسا پارے کہ داواقعہ ٹی شہید مروک آ پولیس کارندہ غاتا خاہوت کن پاکستان اٹی ساڑی چین نا ورکرز ، طالب علم و ایلو بندغ آک اواری اٹ فنڈ ریزنگ کرینو۔ اوکان پد بنجائی وزیر اطلاعات و نشریات چوہدری فواد حسین دود اٹی ساڑی چین نا شاری تتون اوڑدہی کرے و شہید آتے کن داجوزہ غا اوفتا منت واری ءِ ہرفے ۔
