بیجنگ/اسلام آباد۔ 26نومبر (اے پی پی) چین پاکستان اقتصادی راہداری آ پیش رفت آن پد دہشت گردی نا کارروائی سمجھ آن ایڑتر اف، کراچی ٹی چین نا قونصل خانہ غا دہشت گرد ی نا جلہو آن چین وپاکستان نا نیام اٹ جاری کمکاری آ ہچ ءُ پرخ اس تمپک،شیطانی عزم و نزوری نا قوت آتون مون تننگ کن ہڑتوم آ ملک آتا کنڈان پین گام گیج کننگ وخت انا گرج ءِ۔ داہیت ءِ چین نا اخبار گلوبل ٹائمزاٹی شینک مروک آ اسہ جاچ اسے ٹی پاننگانے۔ اخبار نوشتہ کرینے کہ چین پاکستان اقتصادی راہداری آ پیش رفت مننگ آن پد دہشت گرد رڑ و پیشن نا قوت آتا کنڈان دہشت گردی نا کارروائی سمجھ آن ایڑتر اف و داوڑنا جلہو آتیان پاکستان و چین نا نیام اٹ پائیدار و سدابہار تعلقداری و سنگتی نزور مفک ولے مون تروک خلیس آتون مون تننگ کن داڑتون اوار اوار داوڑ نا کارروائی تے توننگ کن ہڑتوم آ ملک آتے پین گام گیج کروئی مریک۔
