اسلام آباد۔ 26نومبر (اے پی پی) چین پاکستان اقتصادی راہداری (سی پیک) ڈٹ انا رداٹ 15سال اٹی 2.3 ملین پوسکن ءُ ملازمت ودی کننگ اٹی کمک رسینگک۔ افرادی واک انا تربیت، فنی و کسبی تعلیم کن پاکستان ءِ چین آن کمک ہلنگ نا گرج ءِ تانکہ ورناتپہ ءِ کسب کار جوڑ کرسا سی پیک نا رداٹ ودی مروک آ افرادی واک انا طلب ءِ پورو کننگ تون اوار اوار بے روزگاری نا کچ ءِ ہم کم کننگ مریک۔ اقتصادی جاچکار جنید زاہد تینا رپورٹ اٹی پارینے کہ سی پیک نا رداٹ پاکستان اٹی 60 ارب ڈالر آن زیات نا زرکاری کننگک۔ داغرض اٹ بنداوی ڈھانچہ و توانائی نا بشخ آتیا خصوصی اہمیت تننگ انگ ءِ۔ اوپارے کہ اسہ سڑک اسہ ڈیہہ ڈٹ انا رداٹ سی پیک اٹی سڑک و ریل انا نیٹ ورک نا شونداری و گچینی نا گام گیج آتون اوار اوار صنعتی بشخ اٹی ہڑتوم آ کنڈآتا کمک ہم بنداوی اہمیت تخک۔ رپورٹ نا رداٹ سی پیک نا رداٹ 2030 ء اسکان روزگار نا پوسکن ءُ وارخواہی ودی مریک ہراڑان بے روزگاری نا کچ ءِ کم کننگ اٹ کمک رسینگک۔
