سیکورٹی فورس آک بروخت کارروائی کرسا ہر مسٹ آ جلہوگیر آتے تپاخت کرسا اوفتا کوزہ غان خودکش جیکٹ ، سلہہ و بارودی مواد دوئی کریر، کراچی پولیس چیف
کراچی۔ 23نومبر (اے پی پی) کراچی نا علاقہ کلفٹن اٹی واقع چینی قونصل خانہ غا سہب انا 9 نیم بجہ نا خڑک 3دہشت گرد آک پترینگ انگ نا کوشست کریر ہراڑا سیکورٹی گارڈ آک اوفتے توریر تو جلہو گیر آک سم کاری کریر ہراٹی 2پولیس کارندہ شہید اسہ سیکورٹی گارڈاس ٹھپی مس وخت اس کہ ورندی کارروائی ٹی 3جلہو گیر تپاخت کریر ، جلہو گیر آتا کوزہ غان خودکش جیکٹ و سلہہ و بارود دوئی کننگا۔ پولیس نا رداٹ قونصل خانہ نا غٹ چینی عملہ باالکل رکھوک ءُ و حالیت آتا مون ءِ توننگانے۔ کراچی پولیس چیف ڈاکٹر امیر شیخ نا رداٹ سہب انا نہہ نیم بجہ نا خڑک 3 دہشت گرد چینی قونصل خانہ ٹی پترینگ انگ نا کوشست کریر، ولے گارڈز آتا توننگ آ دہشت گرد آک سم کاری کریر۔ ہراڑا قونصلیٹ آ تعینات سیکورٹی گارڈ آک ہم ورندی سم کاری کریر، داٹی دھماکہ نا توار ہم خف آ تما۔ پولیس چیف نا رداٹ سیکورٹی فورس آک بروخت کارروائی کرسا ہر مسٹ آ جلہو گیر آتے تپاخت کرسا اوفتا کوزہ غان خود کش جیکٹ، سلہہ و بارودی مواد دوئی کریر۔ کراچی پولیس چیف نا رداٹ جلہو گیر آک گاڑی اسے ٹی بسوسر، ہرافک گاڑی ءِ زرس مُر سلفیر و ولدا قونصل خانہ ٹی پترینگ انگ نا کوشست کریر ولے او قونصلیٹ نا کمپاؤنڈ اٹی پترینگ انگ کتوس۔ کراچی پولیس چیف نار داٹ بمب ڈسپوزل اسکواڈ نا کنڈان علاقہ ٹی سرچ آپریشن کننگا۔ واقعہ نا خڑک آن اسہ شکبر ءُ گاڈی اس ہم ملانے۔ اوکان پد بمب ڈسپوزل اسکواڈ دہشت گرد آتا کوزہ آن ملوک آ بارودی مواد آتے ناکارہ جوڑ کریر۔ ڈی آئی جی ساؤتھ جاوید عالم اوڈھو ہم پک کرے کہ دوبہ دار آتا کنڈان کروک آ بنائی جلہو اٹی قونصلیٹ آ تعینات 2پولیس کارندہ شہید مسر وخت اس کہ اسہ سیکورٹی گارڈ اسے ٹھپی حالیت اٹی جناح ہسپتال آ مون تننگا۔ جناح ہسپتال نا شعبہ حادثات نا سروک ڈاکٹر سیمی جمالی ہم واقعہ ٹی 2پولیس کارندہ غاتا شہیدی ءِ پک کرسا پارے کہ واقعہ ٹی ٹھپی مروک آ سیکورٹی گارڈ ءِ طبی امداد فراوان کننگ انگ ءِ۔ ایس ایس پی ساؤتھ پیر محمد شاہ نا سرکڑدہ ہی ٹی پولیس نا اسہ ایڈوانسڈ پارٹی وخت اس کہ رینجرنا نفری ہم قونصلیٹ اٹی داخل مس و کلیئرنس کارروائی آن پد حالیت آتا پورو مون ءِ توننگا۔
