اسلام آباد۔ 23 نومبر (اے پی پی) چین ءَ کراچی ءَ وتی سفارتی مشن ءِ سر ءَ ناشرکاری ارش ءَ را مذمت گران ءَ گوشت کہ چینی قونصل جنرل ءِ کارندہ ءُُ ماڑی ءَ را رکھینگ ءِ ھوالگ ءَ پاکستانی سیکورٹی فورسز آنی جوانیں پسوئی کاراوائی ءَ را ساڑات۔ آدینگ ءِ روچ ءَ بیجنگ ءَ چینی وزارت ءِ درئی کار ءَ ھمک ھپتگی بریفنگ ءِ ساھت ءَ گوشت کہ ما کراچی ءَ چینی قونصل جنرل ءِ کارندہ ءُُ ماڑی ءِ پاسبانی کنگ ءِ واستہ پاکستانی سیکورٹی فورسز آنی پسوئی کاروائی ءِ گامگیج ءَ را ساڑات۔ ترجمان ءَ ناشرکاری اُرش ءَ دو پولیس کارندہ آنی شہادت ءِ پد ءَ دلپدردی ءِ درشان کت۔ ترجمان ءَ بندات ءَ گوشت کہ ناشرکاری ارش ءَ چہ پد مزن وزیر عمران خان ءَ چینی قونصل جنرل ءَ گوں رابطہ کت ءُُ دلپدردی ءِ درشان کت۔ پاکستان ءَ چینی سرمایہ کاری ھاسیں رنگ ءِ سی پیک ءِ چیر دستی ءَ سرجم بوھوکیں منصوبگ آنی بابت ءَ یک جستے ءِ پسو ءَ دیان ءَ ترجمان ءَ گوشت کہ چین ءُُ پاکستان دوئیں جوانیں سٹریٹجک شریکدات اَنت۔ مئے کمک ءَ چہ دوئیں ملک ءُُ الس آناں نپ رستی ءُُ سی پیک ءِ سر ءَ دیمروئی ءِ پد ءَ دوئیں ملک آنی سروکی تک ءَ ٹوھیں منگ نامہ است۔ ترجمان ءَ گوشت کہ دوئیں ملک آنی دیمروئی ءُُ وشھالی ءَ را دیمروئی دیگ ءِ واستہ سک باز ارزشتی ا،نت اے منصوبگ آں چہ دوئیں ملک آنی الس آنی سرجمیں کمک گون اِنت۔ ترجمان ءَ اے جزم ءِ درشان کت کہ چین سی پیک ءَ را گیش دیم ءَ برگ ءَ پاکستان ءِ گوما یکجائی ءَ کار کنت۔ ارش ءِ بابت ءَ مالوم داری آنی بابت ءَ یک جُستے ءِ پسو ءَ ترجمان ءَ گوشت کہ سئے سلاھ بندیں مردم آں کراچی ءَ چینی مشن ءَ توک ءَ پترگ ءِ کوشست کتگ بلے سیکورٹی فورسز آں سئیں کوشتگ اَنت۔ ترجمان ءَ گوشت کہ تیر گواری ءِ سبب ءَ دو پاکستان ءِ پولیس ءِ کارندہ بیران بوتگ اَنت۔ ترجمان ءَ گوشت کہ چین قونصل جنرل کراچی ءِ توامیں کارندہ ءُُ آئی ءِ گس ءِ مردم بچ اِتگ اَنت۔
