اسلام آباد۔ 23 نومبر (اے پی پی) مزن وزیر عمران خان ءَ آدینگ ءِ روچ ءَ چار نوکیں ٹرین آنی بنگیج کت ایشانی تہ ءَ سندھ ایکسپریس (کراچی ءَ چہ سکھر)، شاہ عبدالطیف بھٹائی ایکسپریس (کراچی ءَ چہ میرپور خاص)، فیصل آباد ایکسپریس ءُُ رحمان بابا ایکسپریس (پشاور ءَ چہ کراچی) ھوار اَنت۔ نوکیں ٹرین آنی بنگیجی مراگش مزن وزیر کارگس ءَ برجم دارگ بوت۔ اے موہ ءِ سر ءَ بُنجاھی وزیر ریل گاڑی شیخ رشید احمد ءَ ھوار بُنجاھی کابینہ ءِ باسک ءُُ ٹوھیں کارندہ ساڑی اتنت۔ پاکستان ریلوے ءِ رد ءَ سندھ ایکسپریس ، کشک کراچی کینٹ، لانڈھی، حیدرآباد، ٹنڈوآدم، شہداد پور، نواب شاہ، خیرپور ءَ چہ گوزان ءَ سکھر ءَ سر بیت۔ سندھ ایکسپریس ءِ اکانومی کلاس ءِ کرایہ 470 کلدار بیت وھدیکہ شاہ عبداللطیف بھٹائی ایکسپریس، کراچی سٹی، لانڈھی، دھابے جی، حیدرآباد ءَ چہ گوزان ءَ میر پور خاص ءَ پُج ایت۔ ایشی ءِ کرایہ 190کلدار بیت۔ ایشی ءَ ابید فیصل آباد ایکسپریس لاہور ءَ چہ گوزان ءَ فیصل آباد، ملتان ءَ تک روت۔ اے کشک ءَ خانیوال ءُُ شور کوٹ ھم ھوار انت، ایشی ءِ اکانومی کلاس ءِ کرایہ 260کلدار بیت۔
