وزیراعظم عمران خان نا کراچی ٹی چینی قونصل خانہ و لوئر اورکزئی ایجنسی ٹی دہشت گرد جلہو آتا ترندی اٹ مذمت ءِ کرسا نہادی جان تا زیان آ ڈکھ و است ہسونی نا درشان، داواقعہ پاک چین اقتصادی و اسٹریٹجک کمکاری نا برخلاف سازش نا بشخ اسے،

وزیراعظم عمران خان نا کراچی ٹی چینی قونصل خانہ و لوئر اورکزئی ایجنسی ٹی دہشت گرد جلہو آتا ترندی اٹ مذمت ءِ کرسا نہادی جان تا زیان آ ڈکھ و است ہسونی نا درشان، داواقعہ پاک چین اقتصادی و اسٹریٹجک کمکاری نا برخلاف سازش نا بشخ اسے،
واقعہ نا پورو جاست وپاست نا پرمان
اسلام آباد۔ 23نومبر (اے پی پی) وزیراعظم عمران خان کراچی ٹی چینی قونصل خانہ و لوئر اورکزئی ایجنسی ٹی دہشت گرد جلہو آتا ترندی اٹ مذمت ءِ کرسا نہادی جان تا زیان آ ڈکھ و است ہسونی نا درشانی ءِ کرے۔ جمعہ نا دے تینا جاری کروک بیان اٹی وزیراعظم عمران خان کراچی ٹی چینی قونصل خانہ نا پیشن سم کاری نا واقعہ نا ترندی اٹ مذمت ءِ کرسا اونا پورو جاست وپاست نا پرمان کرے۔ وزیراعظم پارے کہ دا است ہسون واقعہ نا پس پردہ عنصرآتے پاش کننگے۔ داواقعہ پاک چین اقتصادی و اسٹریٹجک کمکاری نا برخلاف سازش نا بشخ اسے ولے داوڑنا واقعہ غاک پاک چین تعلقداری تے زہمی کننگ کپسہ۔ اوپارے کہ پاک چین سنگتی ہمالیہ غان بڑزو بحیرہ ء عرب آن کڑمب ءِ۔ وزیراعظم پارے کہ کراچی پولیس و رینجرز بھلو جیرت اسے نا درشانی ءِ کریر۔ اوپارے کہ قوم شہید و اوفتا رفقائے کار ءِ جیرت و بہادری نا درشانی کننگ آ خراج تحسین پیش کیک ہراڑا ننے فخر ءِ۔ وزیراعظم لوئر اورکزئی ایجنسی ٹی دہشت گرد آتا جلہو نا ہم مذمت ءِ کرسا شہید آتا درجہ غاتا بڑزی کن دعا کرے و غمزدہ خاہوت آتون ہمدردی نا درشانی ءِ کرے۔ وزیراعظم ٹھپی مروک آتے گچین طبی آسراتی تا فراوانی نا پارت کرے۔ داکان بیدس وزیراعظم تینا اسہ ٹویٹ اسے ٹی پارے کہ داہیت کنے آ بے کچ واضح ءِ کہ چینی قونصل خانہ و لوئر اورکزئی ایجنسی ٹی دا جلہو سجفوک ءُ مہم اسے نا بشخ ءِ ہرانا مسخت داعنصر آتا کنڈان ملک اٹی بے چینی ودی کننگ نا ءِ ہرا پاکستان ءِ شونہال مرسا ہُننگ نا خواہندار افس۔ وزیراعظم پارے کہ چینی قونصل خانہ غا بے سہب جلہو چین نا ننا دورہ نا نتیجہ ٹی پک مروک آ بے مٹ واپاری معاہدہ غاتا ردعمل ءِ۔ دا جلہو نا مسخت چینی زرکار آتے خوفزدہ کننگ و پاک چین اقتصادی راہداری ءِ مجروح کننگ ناءِ۔ اوپارے کہ دا دہشت گرد آک تینا مذموم مسخت آتے ٹی سرسہب مفسہ۔