نیویارک۔ 22 نومبر (اے پی پی) پاکستان اقوام متحدہ ءِ وزیراعظم عمران خان نا کنڈان توہین مذہب نا برخلاف جہانی مہم نا بنانا بابت معلومدار کرسا پارینے کہ دنیا نا غٹ ملک آتے مذہب و اوفتے تون گنڈوک مقدست ہستی تا توہین ءِ توننگ کن جامع گام گیج کروئی مریک۔ اقوام متحدہ ٹی پاکستان نا سفارتی مشن آن جاری اسہ بیان اسے ٹی پاننگانے کہ اقوام متحدہ ٹی پاکستان نا آخبتی مندوب ڈاکٹر ملیحہ لودھی یونائیٹڈ نیشنز الائنس آف سویلائزیشن نا ہشت می گلوبل فورم آن تران کرسا پارے کہ وزیراعظم عمران خان دنیا نا چندی بشخ آتے ٹی مذہب و مقدس ہستی تا توہین نا سدباب نا بابت اسہ اہم ءُ گام گیج اس ہرفنگ نا پڑو ءِ کرینے۔ الائنس آف سویلائزیشن تحمل و مفاہمت ءِ مون آ دننگ اٹ مذہبی راہشون تے اوار کننگ نا زبردست کچ تخک۔ پاکستانی مندوب داوخت آ یات ترفے کہ اونا ملک فلپائن اتون اواری اٹ ہرسال مذہب و دودوربیدہ غاتا نیام اٹ مکالمہ ءِ مون آ دننگ نا مخ تفی آ مبنی قرارداد پیش کیک۔ پاکستان دُن انگا کوشست آتے مونی ہم برجاتخک ۔ داوخت آ اقوام متحدہ نا سیکرٹری جنرل انتو نیو گوتریشن ہم تران کرے۔ گلوبل فورم اٹی اسہ ہزار آن زیات اسکالر آک بشخ ہلکر و پائیدار امن نا کنڈا پیش رفت اکن جھیڑہ غاتا پاناد کننگ کن اجتماعی و تخلیقی وڑوڈول آتا پٹنگ نا بابت معلومداری تا درشانی ءِ کریر۔
