بنجائی وزیر تعلیم و کسبی تربیت شفقت محمود نا ’’اے پی پی‘‘ تون خصوصی ہیت وگپ

اسلام آباد۔ 22 نومبر (اے پی پی) بنجائی وزیر تعلیم و کسبی تربیت شفقت محمود پارینے کہ ملک انا تعلیمی ادارہ غاتے ٹی خوانفوک آ مسہ جتا وڑنا نصاب ءِ اسہ وڑ تعلیمی نظام اٹی بدل کننگک، راج اٹی تپہ ئی بشخ وپانٹ ءِ چٹفنگ نا دا اسٹ انگا ایسری ءِ۔ اسہ وڑ تعلیمی نظام منظوری کن زوت وزیراعظم ءِ گدریفنگک ، تعلیمی ہدف آتا دوئی کننگ کن ’’تعلیمی رضاکار پروگرام ‘‘ کمکار جوڑ مریک۔ پنچ شنبے نادے ’’اے پی پی‘‘ تون خصوصی ہیت وگپ کرسا اوپارے کہ سرکاری اسکول، انگریزی میڈیم و فاق المدارس نا جتا نصاب و معیار آکءُ ہراڑان راج اٹی بشخ وپانٹ ودنگ ءِ۔ اوپارے کہ دا فیصلہ کننگانے کہ ملک اٹی اسہ وڑ تعلیمی نظام ءِ المی جوڑ کننگے ہراڑان تعلیم نا آب اٹی ہم گچینی بریک ۔ بنجائی وزیر اسہ وڑ تعلیمی نظام نا گرج آ زور شاغسا پارے کہ راج انا چندی تپہ غاتا نیام اٹ ودی مروک آ بشخ وپانٹ ءِ چٹفنگ نا دااسٹ انگا ایسری ءِ۔ اومستی پارے کہ بنجائی وزارت تعلیم صوبہ غاتون اواری اٹ تعلیم نا بشخ اٹی چیلنج و ہدف آتا دوئی کن کاریم کننگ ءِ، حکومت تعلیم نا بشخ ءِ مون تروک چیلنج آتا ایسری کن مخلص ءِ و دا چرجوئی ٹی صوبہ غاتے ہم پبی کمک فراوان کننگ ءِ۔ اوپارے کہ اسکول آ ہِننگ نا وئی نا دونیم کروڑ چناہراداوخت اسکان اسکول آتیان پیشن ءُ ، نا تعلیمی ادارہ غاتے ٹی داخلہ اسہ بھلو چیلنج اسے و آخبت پنچ سال اٹی صوبہ غاتا مخ تفی و کمک اتون دا چیلنج نا مون ءِ توننگک۔ اوپارے کہ تعلیمی ہدف آتے دوئی کننگ کن تعلیمی رضار کار پروگرام اس ہم بناکننگ اُن ہرا دا چرجوئی ٹی کمکار مریک۔ اوپارے کہ زالبول نا تعلیم ہم ننا بڑزکو اولیت آتے ٹی اوار ءِ۔