اسلام آباد۔ 22نومبر (اے پی پی) پاکستان اجمل قصاب نا بابت بھارتی آرمی چیف نا بیان آ ردعمل نا درشانی ءِ کرسا پارینے کہ بھارتی آرمی چیف ءِ جارحانہ بیان آتیان احتراز کننگ و سجسا ہیت کننگ نا گرج ءِ، پاکستان نا صبر و تحمل ءِ نزوری تکنگپ ، بھارت مذاکرات اٹی سنجیدہ اف، دُن انگا حالیت آتے ٹی مون آ ہِننگ ممکن اف۔ امریکہ پاکستان نا انٹیلی جنٹس معلومداری نا بنداو آ دہشت گرد آتا برخلاف کیہی سرسہب آپریشن کرینے ہراٹی یا تو دہشت گرد دزگیر مس یا خلنگار۔ پنچ شنبے نادے ہفتہ وار پریس بریفنگ اٹی صحافی تا جتا سوج آتا ورندی ءِ ترسا دفترخارجہ نا ترجمان ڈاکٹر محمد فیصل پارے کہ پاکستان بھارت تون کشمیر تو ن اوار غٹ ایسر نا چاری معاملہ غاتیا ہیت وگپ اکن تیار ءِ ولے بھارت مذاکرات اٹی سنجیدہ اف۔ اقوام متحدہ نا جنرل اسمبلی نا دیوان نا وخت آ بھارت پاکستان تون ہیت وگپ آن تینٹ پدی سلیس۔ ترجمان پارے کہ نن تینا کوشست آتے برجاتخانن ولے ورندی ردعمل مفننگ آن مون آ ہِننگ ممکن اف۔ ترجمان پارے کہ بھارتی دھڑکو تیان اسُل مرعوب مفنہ۔ بھارتی آرمی چیف ءِ جارحانہ بیان آتیان احتراز کننگ و سجسا ہیت کننگ نا گرج ءِ۔ ترجمان بھارتی پنجاب نا وزیر اعلیٰ نا بیان ءِ مسترد کرے وپارے کہ بھارت ءِ بروک آ گچین کاری تیٹی فائدہ کن تینا تہہ نا ویل آتے ٹی پاکستا ن ءِ بایدے لتاڑپ۔ ترجمان پارے کہ بھارت بحر ہند نیول سمپوزیم نا کثیر الجہتی فورم اٹی پاکستان ءِ رزاک اٹ بشخ ہلنگ نا سلہ خلتو وخت اس کہ پاکستان دہشت گردی تو ن اوار غٹ اہم معاملہ غاتیا مذاکرات اٹی شرکت کن مدام بھارت ءِ سلہ خلکونے۔ ترجمان اسہ سوج اسے نا ورندی ءِ ترسا پارے کہ نئی دہلی ٹی پاکستانی ہائی کمیشن 3838 سکھ باتری تے مذہبی رسم آتے ٹی شرکت نا غرض اٹ ویزہ جاری کرینے وخت اس کہ بھارت تون کرتاپور سیم انا بابت زوت جوان ءُ خبر اس ایتینہ۔ امریکی صدر نا ساڑی آ بیان نا بابت اسہ سوج اسے نا ورندی ءِ ترسا ترجمان پارے کہ امریکہ پاکستان نا انٹیلی جنٹس معلومداری نا بنداو آ دہشت گرد آتا برخلاف کیہی سرسہب آپریشن کرینے ہرافتے ٹی یاتو دہشت گرد دزگیر مس یا خلنگار۔ پاک روس تعلقداری نا بابت اسہ سوج اسے نا ورندی ءِ ترسا ترجمان پارے کہ پاکستان و روس انا نیام اٹ ہڑتوم آ کنڈآتا تعلقداری ٹی ترندی اٹ مثبت پیش رفت مننگ ءِ و بروک آ دے تیٹی دا تعلقداریک پین سوگو مریرہ۔
