مسقط۔ 22نومبر (اے پی پی) چیئرمین سینیٹ محمد صادق سنجرانی اومان نا مفتی اعظم شیخ احمد حمادالخلیلی تون اوڑدہی کرے۔ داوخت آ چیئرمین سینیٹ نا ڈل انا باسک آک ہم ساڑی ئسر۔ اوڑدہی ٹی اومان نا مفتی اعظم مسلم امہ کن پاکستان نا خذمت و مخ تفی نا ستاءِ کرسا پارے کہ پاکستان مسلم ملک آتے ٹی اہم ہند اس تخک و امن ءِ مون آ دننگ، شونداری و شونہالی و سیوت کن پاکستان نا کڑد بے مٹ مسنے و آخبت اٹی ہم ہنداوڑ تعمیری و ٹھوس کڑد ادا کرسا کیک۔ مفتی اعظم جہانی امن و شونہالی کن بے پرخ ڈائیلاگ نا مون آ دننگ آ زور شاغا ، داوخت آ مفتی اعظم پاکستان تون تینا خڑکی نا ذکر ءِ کرسا پارے کہ پاکستان تون اونا تعلق چار دہائی تیا محیط ءِ۔ چیئرمین سینیٹ مفتی اعظم نا بصیرت و مفکرانہ خذمت آتا ستاءِ کرے و پارے کہ اسلامی دنیا و خاص کر پاکستان تون کمکاری ءِ مون آ دننگ اٹ او مدام کڑدا دا کرینے۔ بنجائی وزیر سائنس و ٹیکنالوجی سینیٹر محمد اعظم خان سواتی، سینیٹر کلثوم پروین، مولابخش چانڈیو، دلاور خان ، حاجی مومن خان آفریدی و اسپیشل سیکرٹری سینیٹ محمد انور ئسک ہم دا دورہ ٹی چیئرمین سینیٹ تون اوار ءُ۔ پاکستانی ڈل انا سروک مفتی اعظم ءِ پاکستان نا دورہ ءِ کننگ نا سلہ ہم خلک۔
