وزیراعظم عمران خان نا کوالالمپور اٹی پاکستانی کمیونٹی آن تران

کوالالمپور۔ 21 نومبر (اے پی پی) وزیراعظم عمران خان پارینے کہ کس اسے این آر او ایتنہ نئے چارٹرآف ڈیموکریسی نا پن آ مک مکا نا موکل ایتنہ۔ اپوزیشن ءِ حکومت نا چٹفنگ نا بھاز اشتافی ءِ، اوفتے خلیس ءِ کہ اخس ہرے اسکان عمران خان حکومت اٹی مریک اوفتے کن خلیس نا گھنٹی لگسا کیک، ہر سال پاکستان اٹی 10 ارب ڈالر نا منی لانڈرنگ کننگک، حکومتی گام گیج آتا سوب منی لانڈرنگ ءِ بے کچ مشکل جوڑ کینہ، حکومت برآمد آتے ٹی ودکی ، زرکاری ءِ مون آ دننگ، ترسیلات زر انا عمل ءِ کانودی و ضابطہ جوڑ کننگ ومنی لانڈرنگ نا چٹفنگ نا چار ٹکی پروگرام نا کمک اٹ معیشت ءِ گچین جوڑ کننگ نا پالیسی آ روان ءِ۔ پاکستان اٹی اخس پیسہ بروئی ءِ اوٹی ننے وخت اس ہم وام و امداد نا گرج مفک بلکن نن تینٹ نیزگار ملک آتے وام و امداد ایتنہ۔ بروک آ ہفتہ حکومت نا کنڈآن نیزگاری نا چٹفنگ کن اسہ بھلو پروگرام اسے نا پڑو ءِ کننگک، زرکارآتے ملک اٹی زرکاری و واپار اٹی آسانی فراوان کننگ کن وزیراعظم آفس اٹی اسہ دفتر اسے نا جوڑ کننگ انگ ءِ۔ چارشنبے نادے ملائیشیا نا شار کوالالمپور اٹی پاکستانی کمیونٹی آن تران کرسا وزیراعظم عمران خان پارے کہ بندغ، ادارہ و قوم تا زند اٹی شیف بڑزی بریک کاہک ، شیف بڑزی داخاطران بریک انتئے کہ اللہ نا کنڈان دااسہ کلہو اس مریک کہ نم غلطی کننگ اورے اودے سہی کبو، ہراقومک تینا غلطی تے سہی کپسہ اللہ اوفتے برباد کیک ، ولے ہراقوم تینا غلطی تیان ہیل کرسا اصلاح نا کسر آ چلینگک او سوگو مریک۔