راولپنڈی۔ 21 نومبر (اے پی پی) آرمی چیف جنرل قمر جاوید باجوہ ءَ گوشت کہ پاک اُرد بلدیں اُرد ءِ وڑ ءَ مادریں وطن ءِ دیمپانی ءِ واستہ ھمک ساھت ءَ تیار اِنت، گہتر بیت کہ سول ءُُ تران ءِ وسیلگ ءَ ایمنی ءُُ دیمروئی ءِ کشک ءَ روگ بہ بیت۔ پاک اُرد ءِ شوبگ (آئی ایس پی آر) ءِ رد ءَ آرمی چیف جنرل قمر جاوید باجوہ ءَ لائن آف کنٹرول ءِ تر ءُُ تاب کت۔ ورنا آں گوں تران کنان ءَ جنرل قمر جاوید باجوہ ءَ گوشت کہ بھارتی اُرد پہ زانت دوئیں نیمگ ءَ شہری لد مردم آناں نشانگ بندگ ءَ اَنت۔ آئیءَ گوشت کہ بھارتی اُرد لائن آف کنٹرول ءِ سر ءَ جنگ بندی منوگری ءِ ھلاپ کنگ ءَ ھمروچ گیشی بوھگ ءَ انت۔ آرمی چیف ءَ گوشت کہ بھارتی سروکی ءِ نیمگ ءَ جنگ ءَ را دمینگ بوھگ ءَ اِنت۔ آرمی چیف ءَ کشمیری الس ءِ بُرزیں جزم ءُُ دلیری ءَ را ساڑات۔ اے موہ ءِ سر ءَ جنرل آفیسر کمانڈنگ ءَ آرمی چیف ءَ را ایل او سی ءِ تاجگیں جاور ھال آنی سر ءَ بریفنگ دات۔ آرمی چیف ءَ را بھارتی اُرد ءِ کور ءُُ کائی تیر گواری ءِ واکیہ ءِ پد ءَ پاک اُرد ءِ جوانیں پسو ءُُ کاروائی ءِ بابت ءَ ھم سرپد کنگ بوت۔ جنرل قمر جاوید باجوہ ءَ ورنا آنی آپریشنل تیاری ءُُ ٹوھیں جوزگ ءَ را ساڑات۔
