اسلام آباد۔ 21نومبر (اے پی پی) صدر مملکت ڈاکٹر عارف علوی عید میلاد النبی ؑ نا بابت داڑے اڈ ہلوک آ اِرادے ئی رحمت اللعالمین کانفرنس نا آخیریکو سیشن آن تران کرسا پارے کہ داڑے مچ آ دنیا غان بروک آ عالم و شیوخ آک بھاز انگا مقالہ غاتے خوانانو ولے کنا دا بابت علم بھاز محدود ءِ و ای تینا محدود علم انا رداٹ تینا خیال آتا درشانی ءِ کیوہ۔ چارشنبے نادے کانفرنس اٹی بشخ ہلوک آتیان تران کرسا اوترانکار نا تقریر اسے نا حوالہ ءِ ترسا پارے کہ خواجہ ؑ مدام جوان ءُ پن تخفیکہ و دا فرمائفیکہ کہ انسان نا پن نا اونا زند اٹی بھلواثر اس مریک۔ اوپارے کہ کنا باوہ ہم ہراتم کنا پن ءِ تخا تو مدام پارت کرے کہ مچ آ زند اللہ ءِ چاہوک آ جوڑ مر و دابابت تینا کوشست آتے مچ آ زند برجاتخ۔ اوپارے کہ اینو نا سیرت کانفرنس نا سرحال اٹی اِرا لوز رحمت و رحمت اللعالمین ساڑی ءِ۔ عالم آن انت مراد ءِ دنیا اخس بھلن ءِ و اونا بادشاہ اخہ بھلو سے۔ اوپارے کہ ننا آقاؑ نا زند بروک آ چین تے کن مشعل راہ اسے۔ اوپرے کہ گدرینگوک آ 5,6 سال آن کنا ذہن اٹی سوج اسے کہ عالم نا انت تصور ءِ و ننا خواجہ ؑ نا بادشاہت اخس بھلن مروئے۔ اوپارے کہ سائنسدان پارہ کہ کرک آتیا ساڑی ذرات آن زیات ستارہ کائنات اٹی ارے۔ سائنس نا پدریسہ پٹ وپول نا باوجود داوخت اسکان سائنس دان تے کائنات نا پورو سمجھ بتنے کہ دنیا اخس بھلن ءِ؟ ساڑی ہی ٹی کہوک آ اسہ سائنس دان سٹیفن ہاکنگ نا پاننگ ءِ کہ دنیا ننا تصور آن ہم بھاز بھلن ءِ۔ اوپرے کہ کنا آقا رحمت اللعالمین ءِ تو او غٹ تر کائنات آتے کن رحمت اللعالمین ءِ ہراڈغار آ ساڑی ذرہ و خلاء نا استار تیان ہم زیات ءِ۔ اوپارے کہ خواجہ ؑ فرمائفے کہ اللہ تعالیٰ غٹ نبی تیان اسہ اسہ دعا نا قبولیت نا وعدہ کرے و غٹ دعاکریر ہرافتے قبول کننگا۔ اوفرمائفے کہ ای دادعا ءِ کتوٹ انتئے کہ خواجہ ؑ روز آخرت ننا بخشش کن دا دعا ءِ کیک۔
