اسلام آباد۔ 21نومبر (اے پی پی) عید میلادالنبی ؑ نا وخت آ داڑے کنونشن سینٹر اٹی ’’مسلمان تا زمواری ، اسلامی تعلیمات آتا روشنی ٹی ‘‘ نا سرحال آ رحمت اللعالمین ؑ کانفرنس نا ایسری سیشن نا وخت آ صدر مملکت ڈاکٹر عارف علوی ہر سال آمبار اینخو نا سال ہم سیرت النبی ؑ و نعت رسول مقبول ؑ آ کتاب نوشتہ کروک آتے ٹی انعام بشخ وپانٹ کرے۔ داوخت آ کل 53ادیب و شاعرآتے انعام تننگا۔ تدوک آدے وزیراعظم عمران خان 39 شخصیت آتے انعام تس وخت اس کہ چارشنبے نادے کانفرنس نا ایسری سیشن اٹی صدر مملکت ڈاکٹر عارف علوی کتب سیرت و نعت انا مقابلہ غاتے ٹی شریک نمان پوزیشن ہلوک آ 4ادیب و شاعر آتے ٹی انعام بشخ وپانٹ کرے۔ چناتے کن سیرت نا کتاب نوشتہ کننگ آ کراچی آن تعلق تخوک آ حافظہ راحت عائشہ ءِ اولیکو وخت اس کہ لاہور آن عمران مشتاق ءِ ارٹ میکو و ملتان آن تعلق تخوک آ علیم عمران ممتاز ءِ مسٹ میکو انعام تننگا۔ ہنداوڑ بنوں آن تعلق تخوک آ ڈاکٹر حسین محمد قریشی و ناصر داؤد تون اوار علاقائی زبان تے ٹی سیرت النبی ؑ آ کتاب نوشتہ کروک آتے ہم انعام تننگا۔ ہنداوڑ کتب اردو نعت کیٹیگری ٹی محمد طفیل اعظمی ءِ اولیکو، محمد امین ساجد سعیدی ءِ ارٹ میکو و ضیاء اللہ حیدر ءِ مسٹ میکو انعام تننگا۔ صدر مملکت مالاکنڈ آن تعلق تخوک آ ڈاکٹر علی خیل ءِ پشتو زبان اٹی نعت آ کتاب نوشتہ و شکار پور آن تعلق تخوک آ غلام محمد قادری ءِ سندھی زبان اٹی کتاب نوشتہ کننگ آ انعام تس۔ داکان بیدس اومقابلہ غاتے ٹی نمان پوزیشن ہلوک آ ایلو ادیب و شاعر آتے ہم خصوصی انعام تس۔ داوخت آ بنجائی وزیر مذہبی امور و بین المذاہب ہم آہنگی نورالحق قادری صدر مملکت ڈاکٹر عارف علوی ءِ خصوصی شیلڈ اس پیش کرے۔
