اسلام آباد۔ 21نومبر (اے پی پی) علامہ طاہر اشرفی پارینے کہ ختم نبوت آ جلہو کروک آتا برخلاف وزارت مذہبی امور اٹی سینٹر اس جوڑ کننگے، وزیراعظم عمران خان نا منت وار اُن کہ او جیرت مندی اٹ امریکی صدر نا ٹویٹ نا ورندیءِ تسنے۔ داخیال آتا درشانی ءِ او چارشنبے نادے سیرت النبی ؑ کانفرنس آن تران کرسا کرے۔ اوپارے کہ اوغانستان نا دارالحکومت کابل اٹی مذہبی اجتماع ٹی دھماکہ و مولانا سمیع الحق قادری آ جلہو نا ترندی اٹ مذمت ءِ کیوہ۔ اوپارے کہ نن پرفتن دوراسے آن گدرینگ انگ اُن و ہردے ننے پوسکن ءُ فتنہ غاتون مون تروئی تمک۔ اوحکومت آن خواست کرے کہ وزارت مذہبی امور نا کنڈآن اسہ سینٹر اس جوڑ کننگے ہرا ختم رسالت آ جلہو کروک آتا برخلاف پبی کارروائی کے۔ اوپارے کہ قادیانی اسہ مذہب اس آخا بلکن فتنہ سے نا پن ءِ۔ اوپارے کہ انگریز سجفوک ءُ ڈٹ اسے نا رداٹ مرزا غلام محمد قادیانی نا سرپرستی ءِ کرے تانکہ جہاد ءِ چٹفنگے۔ طاہر اشرفی پارے کہ منہ دے آن امریکی صدر ڈونلڈ ٹرمپ ٹویٹ نا کمک اٹ پاکستان مخالف بیان تننگ ءِ و ای وزیراعظم عمران خان نا منت وار اُٹ کہ او جیرت مندی اٹ اونا ٹویٹ نا ورندی ءِ تس۔ اوپارے کہ امریکہ شاید دا سمجھاکہ کہ نن چپ مرینہ اودے دا جوان سمامرے، نائن الیون آن پد پاکستان ا مریکہ نا جنگ ءِ کرینے و نن 80 ہزار جان تا نذرانہ ءِ پیش کرینن۔
