بیجنگ۔ 21نومبر (اے پی پی) چین اٹی پاکستان نا سفیر مسعود خالد پارینے کہ کشاری بشخ اٹی پاک چین کمکاری آن پاکستان نا جم اٹنگا کشاری پیداوار و الس نا زند انا آب اٹی گچینی بریک۔ بیجنگ اٹی آل چائینہ فیڈریشن آف ٹریڈیونینز (اے سی ایف ٹی یو) نا کنڈان مسٹ میکو چائینہ پاکستان ینگ ورکرز سیمینار کیمپ انا دود آن تران کرسا او داخیال آتا درشانی ءِ کرے۔ دود انا مسخت مچ آ ملک انا چندی بشخ آتے آن پاکستان نا سرکاری و نجی ادارہ غاتا چنکا و درمیانہ درجہ نا ملازم آتے تربیت نا فراوانی ءِ، کیمپ انا اڈتننگ آن اوفتے چین نا شونداری آن آگاہی فراوان کننگ و ورکرز نا کہول آ پاک چین ہڑتوم آ کنڈآتا تعلقداری تے مون آ دننگ اٹ کمک دوئی مریک۔ پاکستان نا سفیر دود آن تران اٹی ورناورکرز آتا سیمینار نا اڈتننگ آن پاک چین سنگتی نا رابطہ غاتے پین ودفنگک۔ اووزیراعظم عمران خان نا ساڑی آ چین نا دورہ نا حوالہ ءِ ترسا پارے کہ داڑان پاکستان نا معاشی شونداری تون اوار ایلو بشخ آتا گچینی ٹی کمک رسینگک۔ اوپارے کہ راجی و معاشی شونداری کن ہڑتوم آ کنڈآتا کمکاری نا ودکی آن پاکستان نا صنعتی کارکڑد ، ایس ایم ایز نا بشخ انا گچین اٹی کمک تون اوار اوار کشاری کمکاری آن ملک انا جم اٹنگا پیداوار ءِ مون آ دننگ و خلقت نا زند انا آب اٹی گچینی بریک۔ پاکستان آن ورناتا 37 باسکی ڈل کیمپ اٹی شرکت کرینے۔
