اسلام آباد۔ 20نومبر (اے پی پی) بنجائی وزیر پاور ڈویژن عمر ایوب خان پارینے کہ بجلی نا پیداوار اتون اوار اوار ترسیل نا ویل آتے ہم ایسر کننگ نا گرج ءِ، این ٹی ڈی سی نا سسٹم 19 نیم ہزار میگاواٹ آن زیات بجلی ہرفنگ نا قابل اف، مر مر انگا خلقی علاقہ غاتے ٹی شمسی توانائی آن بجلی فراوان کننگک، توانائی معیشت کن لائف لائن ءِ، ننے کشت و کشار، صنعت تون اوار اُرائی صارف آتے کن ہڑزان بجلی ودی کروئی ءِ، ملک اٹی بجلی نا طلب نا وخت اس ہم جاچ ءِ ہلنگ تنے، کبین بجلی ودی کننگ آن نن دنیا ٹی مسابقت کننگ کپنہ۔ اوداخیال آتا درشانی ءِ سے شنبے نادے داڑے متبادل توانائی نا ترقی بورڈ انا کنڈآن قابل تجدید پالیسی نا بابت سلابتی ورکشاپ آن تران کرسا کرے۔ عمر ایوب خان پارے کہ پاکستان ءِ اسہ آخا اِرانسخان تا مون تروک ءِ ہرافتے ٹی مالیاتی و جاری کھاتہ غاتا نسخان اوار ءِ۔ اوپارے کہ ہڑزان بجلی نا پیداوار نا سوب آن متبادل ذریعہ غا سیبو ودنگ ءِ، متبادل ذریعہ اٹ ودی مروک آ بجلی نا گریڈ ویلیو آ ہم چکار کروئی مریک۔ این ٹی ڈی سی ٹی چندی اڑاند آتا مون تروک ءِ و این ٹی ڈی سی نا نظام 19نیم ہزار میگاواٹ آن زیات بجلی ہرفنگ نا قابل اف۔ اودے صنعت، کشت وکشار ، اقتصادی شونداری ، آبادی و اُرائی صارف آتے کن ہڑزان بجلی ودی کروئی ءِ۔ کبین بجلی آن نن دنیا ٹی مسابقت کننگ کپنہ۔ اوپارے کہ اینو اسکان بجلی نا طلب نا حقی جاچ ءِ ہلنگ تنے۔ معیشت اگہ 4درسد نا کچ آن شون ہلیک تو طلب جتا مریک و اگہ شرح نمو 6 و 7 درسد مرے تو طلب نا حساب وکتاب جتا مریک۔
