اسلام آباد۔ 20نومبر (اے پی پی) وزیراعظم عمران خان جہانی رحمت اللعالمین ﷺ کانفرنس اٹی سیرت طیبہ غا فی البدیہ، مدلل و مربوط وڑاٹ خیال آتا درشانی ءِ کرسا محفل نا ساڑی مروک آتے حیران کرے۔ سے شنبے نادے 2دے ئی جہانی رحمت اللعالمین ﷺ کانفرنس نا بنائی دیوان آن تران کرسا وزیراعظم عمران خان نوشتہ مروک آ تقریر نا سیبو ءِ ہلنگ آن بیدس فی البدیہ وڑاٹ سیرت طیبہ نا چندی پہلو تے تالان کرے۔ خاص کر او خواجہ نا تینا صحابہ کرامؓ نا کڑد سازی نا بابت ہیت کرسا پارے کہ ننے غٹ ءِ داہیت ءِ ہُننگ نا گرج ءِ کہ خواجہ ہراوڑ تینا سنگت آتا کڑد سازی ءِ کرے ہرانا سوب رومی و ایرانی سلطنت آک مسلمان تا مون آ سرنگو مسر۔ عمران خان سیرت طیبہ نا بابت ملک انا بھلو یونیورسٹی تیٹی سیریت چیئر اس ٹہیفنگ نا پڑو کرے و پارے کہ غٹ آن اولین گرج داہیت انا ءِ کہ داہیت آ پٹ وپول کننگے کہ ہراوڑ خواجہ تینا صحابہ کرام نا تربیت ءِ کرے و گونڈ ءُ وخت اسے ٹی اوفتا فتوحات آتا سوب آن اسلامی سلطنت مراکش آن نیامی ایشیا اسکان تالان مس۔ عمران خان تینا تقریر اٹی داہیت آ خاص وڑاٹ زور شاغا کہ برصغیر اٹی ہم اسلام صوفیا کرام نا فلسفہ امن و مابت و اوفتا کڑد انا سوب آن تالان مس۔ عمران خان پارے کہ پورو ایمان انسان نا تہٹی ہمووخت آ بریک ہراتم او نبی پاک نا عشق اٹی مبتلا مرسا خواجہ نا وڑوڈول آتے اختیار کیک۔
