کوئٹہ۔ 20 نومبر (اے پی پی) فرنٹیئر کور بلوچستان نا کمانڈر تصوف سلطان پارینے کہ 2015ء آن فراری تا کنڈان سلہہ بٹنگ نا چرجوئی برجاءِ ہرانا رداٹ سدآ فراریک سلہہ بٹسا قومی دنگ اٹی اوار مرسا ملک انا شونداری و شونہالی ٹی تینا کڑد ءِ ادا کننگ ءُ ہراکہ ستاکڑزک۔ داہیت ءِ او بلوچستان اسمبلی نا سبزہ زار اٹی فراری کمانڈر سلہہ بٹنگ و قومی دنگ اٹی اوار مننگ نا دود آن تران کرسا پارے، اوپارے کہ پیشن نا ملک عنصر آک پاکستان نا برخلاف سازش کننگ ءُ پاک فوج اوفتے اوفتا مذموم عزم اٹی سرسہب مننگ کن ہلیپک، اوپارے کہ بلوچستان نا خلقت وطن پرست ءُ و پاکستان و بلوچستان نا شونداری ٹی اہم کڑد ادا کرسا کیرہ، ایف سی بلوچستان نا کنڈان بلوچستان اسمبلی ٹی فراری کمانڈرآتا سلہہ بٹنگ نا دود اس اڈ ہلک، ہراٹی بلوچستان لبریشن آرمی نا 70 آن زیات فراریک کمانڈر دوران مری عرف بزرگ نا سرکڑدہ ہی ٹیی سلہہ بٹیر ۔ داوخت آ فراری کمانڈر نا پاننگ ئس کہ پیشن نا ملک اٹی تولوک ملک دشمن آتا بہکاوہ ٹی برسا سلہہ ہرفیسر ولے ہراتم ننے اوفتا ملک دشمنی نا معلوم مس تو نن داسہ سلہہ بٹسا ملک انا تعمیر و شونداری ٹی تینا کڑد ءِ ادا کننگ خوانہ اومیت ءِ کہ حکومت ننے و ننا خاہوت ءِ رکھ فراوان کیک۔ دود اٹی سینیٹر انوارالحق کاکڑ، سینیٹر سرفراز بگٹی و نواب چنگیز مری ئسک ہم ساڑی ئسر۔
