اسلام آباد ۔ 19 نومبر (اے پی پی) مزن وزیر عمران خان ءَ گوشت کہ امریکی صدر ڈونلڈ ٹرمپ ءَ را وتی ریکاٹ راست کنگ ءِ ضلورت اِنت، اِچ پاکستانی نائن الیون ءِ واکیہ ءِ تہ ءَ دست مانج نہ بوتگ، بلے پدا ھم پاکستان ءَ ناشرکاری ءِ ھلاپ ءَ امریکی جنگ ءَ بھر زوری کنگ ءِ پیسلہ کتگ، مزن وزیر ءَ دو شمبے ءَ وتی ٹویٹ ءِ تہءَ گوشت کہ پاکستان ءِ ھلاپ ءَ بھتام آنی رد ءَ ڈونلڈ ٹرمپ ءَ را وتی ریکاٹ راست کنگ ءِ ضلورت اِنت، اول سر ءَ تو پاکستانی نائن الیون ءِ واکیہ ءَ اِچ رنگ ءَ دست مانج نہ بوتگ بلے پاکستان ءَ ناشرکاری ءِ بابت ءَ امریکی جنگ ءَ بھر زوری کنگ ءِ پیسلہ کتگ۔ دومی پاکستان ءَ اے جنگ ءَ 75 ہزار مردم آنی جانی ءُُ 123 ارب ڈالر ءَ چہ گیش تاوان بار جتگ کپتگ وھدیکہ امریکی کمک ایوکءَ 20ارب ڈالر ءِ بوتگ۔ مزن وزیر ءَ گوشت کہ وتی ناکامی آنی پد ءَ پاکستان ءَ را کربانی ءِ پس کنگ ءِ مٹ ءَ امریکہ ءَ را اے گپ ءِ سر ءَ چار ءُُ بچار زورگ لوٹ ایت یک لکھ 40ہزار نیٹو ءِ ارد ایشاں ھوار ڈھائی لکھ اوگان اُرد ءِ گوما جنگ ھواریں رنگ ءَ یک ٹریلین ڈالر ھرچ کنگ ءَ ابید اوگانستان ءَ طالبان پیسر ءَ چہ گیش مرچی مھکم اَنت۔ مزن وزیر ءَ گوشت کہ پاکستان ءَ قبائلی دمگ تباہ بوتگ اَنت ءُُ لکھاں مردم بے لوگ بوتگ اَنت۔ جنگ ءَ لس پاکستانی آنی زندمان آماچ بوتگ اَنت۔ مزن وزیر ءَ گوشت کہ زمیننی ءُُ بالی رسانکی آناں یک شل ءَ فری لائنز پُجارینگ ءَ انت۔ آئی ءَ گوشت کہ چے مسٹر ٹرمپ اے رنگیں وتی ھمبراھے نام ءَ گوشت کنت کہ آئی ءَ اے رنگیں کربانی داتگ؟ یات دارگ بہ بیت کہ مزن وزیر ءَ اے ٹویٹس 18 نومبر ءَ امریکی صدر ڈونلڈ ٹرمپ ءِ ’’فاکس نیوز‘‘ ءِ سر ءَ شنگ بوتگیں گلگدارے آئی ءِ تہءَ پاکستان ءِ سر ءَ بھتام جنگ بوتگ اَت ، بھتام آنی تہ ءَ گوشگ بوتگ اَت کہ آئی ءَ امریکہ ءِ واستہ اِچ نہ کتگ ءُُ ٹرمپ ءَ پاکستان ءَ را کروڑانی ڈالر اامریکی اُرد ءِ کمک ءَ را دارگ ءِ امریکی انتظامی ءِ پیسلہ ءِ دیمپانی کت۔
