دفترخارجہ چین نا یونیورسٹی ٹی پاکستانی طالب علم انا خون نا بابت سوشل میڈیا غا وائرل مروک آ رپورٹ ءِ مسترد کرے
اسلام آباد۔ 19 نومبر (اے پی پی) دفترخارجہ چین نا یونیورسٹی ٹی پاکستانی طالب علم اسامہ احمد خان نا خون نا بابت سوشل میڈیا غا وائرل مروک آ رپورٹ ءِ مسترد کرسا اودے ’’فیک نیوز‘‘ گوندسا غٹ خلقت آتون پارینے کہ او محتاط طرز عمل نا درشانی ءِ کرسا سنسی تالان کننگ آن پاناد کیر۔ دفترخارجہ نا کنڈآن دوشنبے نادے داڑے جاری بیان اٹی ترجمان پارے کہ اسامہ احمد خان چین نا صوبہ لیوننگ نا شنیانگ جیاژو یونیورسٹی نا طالب علم ئس و او خودکشی کرینے۔ ترجمان پارے کہ دااحوال نا ملنگ آن پد چین اٹی پاکستان نا سفیر سفارت خانہ نا اسہ آفیسر اسے طالب علم ، فیکلٹی باسک و پولیس کمامدار آتون رابطہ کن شنیانگ آ گدریفے۔ دا مچ آ عمل اٹی ہندا آفیسر کہوک آ طالب علم نا خاہوت تون رابطہ ٹی ئس و چینی کمامدارآک اودے پبی کمک فراوان کریر۔ ترجمان پارے کہ پاکستانی مشن نا کہوک آ طالب علم نا خاہوت تون پورو رابطہ ءِ و میت دوشنبے نا نن اسکان پاکستان آ رادہ کننگک۔ 17 نومبر آ پاکستان طالب علم نا میت ءِ لیوننگ آن بیجنگ گدریفنگا و داسہ اودے پاکستان آ رادہ کننگ کن حتمی دروشم تننگانے ۔ ترجمان پارے کہ گرج داہیت انا ءِ کہ دامعاملہ ٹی غمزدہ خاہوت و معاملہ نا پراؤیسی ءِ مون آ تخنگے۔ ترجمان سوشل میڈیا غا وائرل مروک آ داویڈیو ءِ فیک گوندا ہراٹی مبینہ وڑاٹ اسامہ احمد اتون مارپیٹ نشان تننگانے۔ ترجمان پارے کہ درحقیقت دا ویڈیو فیک ءِ و داٹی نشان تروک آ بندغ اسامہ احمد خان اف۔ ترجمان پارے کہ نن غٹ خلقت آن خواست کینہ کہ او احتیاط نا درشانی ءِ کرسا سنسنی خیزی و فیک نیوز تالان کننگ آن پاناد کیر۔
