نارتھ ساؤتھ پیپ لین پروجیکٹ نا چاگڑدی و راجی اثرآتا جاچ آن چاگڑد و جنگلی حیات نا رکھ ءِ المی جوڑ کننگ مریک
اسلام آباد۔ 19 نومبر (اے پی پی) وزیر مملکت موسمیاتی بدلی زرتاج گل پارینے کہ 800 کلومیٹر مریس نارتھ ساؤتھ پیپ لین پروجیکٹ نا چاگڑدی و راجی اثرآتا جاچ آن چاگڑد و جنگلی حیات نا رکھ ءِ المی جوڑ کننگ مریک۔ او دوشنبے نادے داڑے قومی کہول انا سلابتی سیشن اٹی تران کریکہ ہراٹی نارتھ ساؤتھ گیس پیپ لین پروجیکٹ نا سلاہ ئی ڈٹ انا چاگڑدی و راجی اثرآتا بارواٹ تعلقدار شریدار آک ہیت وگپ کریر۔ داڈٹ ملک اٹی قدرتی گیس انا کمتی نا ویل انا مون ءِ توننگ کن جوڑ کننگک۔ اوپارے کہ پاکستان ءِ چاگڑدی انحطاط و موسمیاتی بدلی نا اثرآتا ادراک ءِ، ملک ءِ موسمیاتی بدلی و دا کون آایلو عوامل آتا سوب ودوک آ غیر روایتی خلیس آتا مون تروک ءِ ہنداخاطران المی ءِ کہ چاگڑدی انحطاط ءِ توننگ کن ہڑدڑی گام گیج کننگے۔ زرتاج گل پارے کہ دا پیپ لین سندھ و پنجاب نا صوبہ غاتے ملفک ہراڑان تعلقداریک پین سوگو مریرہ ولے دا چرجوئی ٹی ودی مروک آ چیلنج آتون ہم گرنچی نا گرج ءِ۔ ای ایم سی پاکستان نا منیجنگ ڈائریکٹر سید ندیم عارف داوخت آ ڈٹ انا بارواٹ سرجم احوال آتے ترسا پارے کہ دا گیس انا کاختی نا مون ءِ توننگ نا حکومتی کوشست آتا بشخ اسے، دا ڈٹ انا کمک اٹ سندھ اٹی نواب شاہ آن قدرتی گیس پنجاب اٹی ننکانہ صاحب ءِ فراوان کننگک۔ اوپارے کہ دا گیس پیپ لین نا سٹڈی انٹرسٹیٹ گیس لمیٹڈ و ااونا شریدار کمپنی تا کنڈان کننگا۔ ڈٹ انا بارواٹی قومی کہول آ سلابت کننگ انگ ءِ۔ دا پیپ لین نا روٹ نواب شاہ آن خیر پور ، سکھر ، گھوٹکی، رحیم یار خان، بہاولپور، وہاڑی ، پاکپتن ، بہاونگر، اوکاڑہ ، قصور و ننکانہ صاحب ءِ۔ داڈٹ انا پوروی آن علاقہ ٹی گیس انا کاختی نا مون ءِ توننگ اٹ کمک رسینگک۔ پاکستان نا چاگڑدی رکھ انا ادارہ ای پی اے نا مسکوہی ڈائریکٹر جنرل آصف شجاع خان ہم داوخت آ خیال آتا درشانی ءِ کریر۔
