اسلام آباد۔ 19 نومبر (اے پی پی) اسلام آبادچیمبر آف کامرس اینڈ انڈسٹری نا ڈل صدر احمد حسن مغل نا سرکڑدہ ہی ٹی پاکستان اٹی سعودی عرب نا سفیر نواب سعید المالکی تون اوڑدہی کرے۔ دوشنبے نادے آ مروک آ اوڑدہی ٹی پاکستان و سعودی عرب نانیام اٹ واپاری و اقتصادی تعلقداری تے پین گچین جوڑ کننگ نامعاملہ غاتیا خیال آتا درشانی ءِ کریر۔ ڈل اٹی چیمبر نا سینئر نائب صدر رافعت فرید، نائب صدر افتخار انور سیٹھی، چیمبر نا ڈپلومیٹک کمیٹی نا چیئرمین خالد ملک و ایلوفک اوار ئسر۔ داوخت آ ڈل اتون ہیت وگپ کرسا سعودی عرب نا سفیر نواف سعید المالکی پارے کہ پاکستان کاروباری و اقتصادی شونداری نا عمدہ لائخی تخک ہرادے زیات تالان کننگ نا گرج ءِ تانکہ پیشن نا زرکارآک پاکستان اٹی مروک آ کاروبار و زرکاری نا وارخواہی تیان پبی فائدہ ہرفنگ کیر۔ اوپارے کہ وزیراعظم پاکستان برآمد آتے مون آ دننگ اٹ بھاز است خواہی تخک ہراڑکن حکومتی کہول آ ایلو ملک آتون رابطہ غاتے مون آ دننگ تون اوار اوار السی کہول آ ہم رابطہ غاتے مون آ دننگ نا گرج ءِ تانکہ پیشن نا ملک آتیان خلقت پاکستان آ برے و اونا کاروباری لائخی نا بارواٹی گچین آگاہی دوئی کننگ کیر۔ اوپارے کہ پاکستان نا امیج ءِ پین گچین وڑاٹ دنیا نا مون آ پیش کننگ ناگرجءِ ہراڑان پاکستان گچین وڑاٹ جہانی زرکار آتا چکار ءِ دوئی کننگ کیک۔
