سرینگر۔ 19نومبر (اے پی پی) مقبوضہ کشمیر اٹی کل جماعتی حریت کانفرنس نا چیئرمین سید علی گیلانی پارینے کہ جموں و کشمیر اٹی بھارت نا ظلم و بربریت و سفاکیت نا حکومت برجاءِ و کشمیری تا حق ءِ فوجی واک انا بنداو آ سلب کننگانے۔ کشمیر میڈیا سروس نا رداٹ سید علی گیلانی حیدر پورہ سرینگر اٹی حریت کانفرنس نا کنڈآن سیر ت النبی ﷺ کانفرنس آن تران کرسا سیرت پاک ءِ سرجمی اٹ مون آ تخسا پارے کہ پیغمبر اسلام خواجہ محمد ﷺ خاص ءُ قوم ، قبیلہ ، چین یا عقیدہ سے نا پیروکار آتے کن آخا، بلکن غٹ انسانیت و غٹ جہان تے کن رحمت جوڑمرسا گدریفنگا نے و اونا کلہو امن، سلامتی ، عدل و انصاف آٹی ءِ۔ اوداوخت آ پارے کہ چندی جیل آتے ٹی نظر بند کشمیری تا حال و زار آ گڑتی نا درشانی ءِ کرسا پارے کہ اوفتے سیاسی اختلاف آتا بنداو آ انتقامی کارروائی تا نشانہ جوڑ کننگ انگ ءِ۔ اوکور انگا کانود پبلک سیفٹی ایکٹ نا رداٹ آجوئی پسند راہشون آتے بھارت نا مر مر انگا جیل تے ٹی گدریفنگ آ غم و غصہ نا درشانی ءِ کرسا پارے کہ بھارتی حکمران کشمیری تے انتقامی کارروائی تا نشانہ جوڑ کننگ کن دانستہ وڑاٹ اوفتے مر مر انگا جیل آتے ٹی گدریفسا اوفتے تون تینا خار انا درشانی ءِ کیرہ۔
