اسلام آباد۔ 19 نومبر (اے پی پی) خواجہ ؑ نا ودی دے انا وخت آ 2 دے ئی جہانی رحمت اللعالمین کانفرنس (اینو) سے شنبے نادے آ بناکیک، وزارت مذہبی امور نا کنڈان 2دے ئی سیرت کانفرنس نا جم وڑاٹ مسہ سیشن مریرہ۔ بنائی دیوان اٹی وزیراعظم عمران خان مہمان خاص مریک وخت اس کہ (اینو) سے شنبے ناشام کانفرنس نا ارٹ میکو سیشن اٹی پاکستان تون اوار ایلو اسلامی ملک آتیان بروک آ جید عالم دینک خواجہ نبی پاک ؑ نا سیرت طیبہ نا جتا پہلو تیا گپ و تران کیرہ۔ 21نومبر آ سیرت کانفرنس نا ایسری نشست اٹی صدر مملکت ڈاکٹر عارف علوی مہمان خاص مریک۔ اینخو نا سال سعودی عرب، مراکش، مصر، ایران تون اوار ایلو اسلامی ملک آتیان ہم مندوبینک سیرت کانفرنس اٹی بشخ ہلیرہ۔ اینخو نا سال کانفرنس نا سرحال ’’ختم نبوت و مسلمان تا زموری تعلیمات نبوی نا روشنائی ٹی ‘‘ ءِ ، مسٹ میکو و آخیریکو سیشن اٹی ہی صدر مملکت ڈاکٹر عارف علوی قومی و علاقائی زبان تے ٹی کتب سیرت ، نعت و مقالہ سیرت ؑ آ مقابلہ غاتے ٹی اول ، ارٹ می و مسٹ می بروک آتے انعام ایتک، رحمۃ اللعالمین ﷺ کانفرنس اٹی مچ آ ملک آن غٹ مکتبہ ہائے فکر انا عالم دین ، سفارت کار ، سول سوسائٹی و سیاسی سرکڑدہ غاتے بٹنگانے۔ یات سلے کہ اینخو نا سال حکومت خواجہ ؑ نا ودی دے ءِ قومی کہول آ اڈتننگ نا فیصلہ کرینے ہرانا مسخت مچ آ دنیا اسکان خواجہ ؑ نا امن و مابت نا کلہو ءِ سرکروئی ءِ و کانفرنس نا سرحال ہم ’’ختم نبوت و مسلمان تا زمواری تعلیمات نبوی نا روشنائی ٹی‘‘ تخنگانے ہراڑان صاف واضح ءِ کہ ختم نبوت نا معاملہ غا اسہ ہم کلمہ گواس ہچ وڑنا ہچ ءُ سمجھوتہ اس کننگ کپک۔ ختم نبوت ؑ آ غٹ عالم اسلام نا اجماع ءِ، دادے منیپروک آک اسلام آن دنگ آن خارج ءُ، خواجہ ؑ نا کلہو رحمت غٹ مذہب، غٹ ادیان و مچ آ مخلوق آتے کن ءِ۔ وزارت مذہبی امور نا ذرائع نا رداٹ اینخو نا سال دسمبر نا ایسر اٹی جہانی بین المذاہب کانفرنس اس اڈتننگک ہراٹی جامعہ الازہر ، امام کعبہ، پوپ یا اونا خاص ءُ نمائندہ اس شرکت کیک و دا کانفرنس لاہور اٹی مریک۔ دانا کماشی ءِ ہم وزیراعظم عمران خان کیک۔ وزارت مذہبی امور نا رداٹ اینخو نا سال چندی شار تے ٹی مچ آ سال اٹی سیرت ؑ نا پروگرام تے برجاتخنہ۔
