اسلام آباد۔ 19نومبر (اے پی پی) چین پاکستان اقتصادی راہداری (سی پیک ) انا پروجیکٹ ڈائریکٹر حسن داؤد بٹ پارینے کہ سی پیک نا رداٹ پاکستان اٹی 9 اکنامک زون تے آپریشنل کننگ کن کاریم ترندی اٹ برجاءِ ہراٹی رشکئی اکنامک زون نا تیاری کن خیبر پختونخوا حکومت بنائی شونداری کاریم نا بناءِ کرینے و ایلو کاریم تے کن سی آر بی سی تون معاہدہ پک مننگ والا ءِ۔ داخیال آتا درشان ءِ او دوشنبے نادے ’’اے پی پی‘‘ تون خصوصی ہیت وگپ کرسا کرے۔ حسن داؤد بٹ پارے کہ ساڑی آ حکومت نا سی پیک نا رداٹ اکنامک زون آ خصوصی فوکس ءِ و اوڑا کاریم ءِ فاسٹ ٹریک آ اتنگ اٹ پبی وڑاٹ کاریم کننگ ءِ۔ اوپارے کہ تدوک آ دے تیٹی زرکاری بورڈ دا اکنامک زون تا بابت دیوان اس ہم مس ہراٹی رشکئی ، فیصل آباد، بوستان ، دھابیچی تون اوار غٹ اکنامک اقتصادی زون تا بابت تعلقدار ادارہ غاتے خصوصی پارت کرے کہ اکنامک زون تیا اولیتی بنداو تیا کاریم کننگے و کاریم ءِ زوت ایسری اسکان سرکننگے۔
