کوئٹہ۔ 19 نومبر (اے پی پی) وزیراعلیٰ بلوچستان نا سلاہکار لائیو اسٹاک وڈیری ڈویلپمنٹ حاجی میٹھا خان کاکڑ پارینے کہ بلوچستان اٹی جاری خشک سالی و دیر انا کمتی نا سوب آن کشت وکشار و لائیو اسٹاک نا بشخ بھاز بے وڑ زہمی مسنے بزغر و زمیندار تے مون تروک ویل آتون مون تننگ و کشت و کشار ءِ مون آ دننگ کن حکومت آسٹریلیا و فوڈ اینڈ ایگریکلچر اینڈ آرگنائزیشن نا اواری اٹ بلوچستان نا 6ضلع غاتے ٹی کثیر المدتی پروگرام آن صوبہ نا الس ءِ زیات ریلیف ملک، داخیال آتا درشانی ءِ او دوشنبے نادے آسٹریلیا بلوچستان کشت وکشار بزنس پروگرام فیز II انا بناءِ کننگ نا وخت آ ہندی ہوٹل اٹی اڈ ہلوک آ دود آن مہمان خاص نا حیثیت اٹ تران کرسا کرے۔ داوخت آ پاکستان اٹی تعینات آسٹریلین ڈپٹی ہائی کمشنر Mr. Brek Batley ، ڈائریکٹر جنرل کشت وکشار جاوید ترین، ڈائریکٹر جنرل لائیو اسٹاک ڈاکٹر غلام حسین جعفر، ڈائریکٹر جنرل کشت وکشار (توسیع) انعام الحق شنواری ، ڈاکٹر محمد اعظم کاکڑ، ڈاکٹر غلام رسول ئسک ہم ساڑی ئسر۔ صوبائی سلاہکار لائیو اسٹاک و ڈیری ڈویلپمنٹ حاجی میٹھا خان کاکڑ پارے کہ فیز II اٹی بلوچستان نا 6ضلع چاغی ، کیچ، مکران ، پنجگور ، نوشکی و واشک اٹی پروگرام نا بناءِ کننگ انگ ءِ، ہنداخاطران حکومت آسٹریلیا و فوڈ اینڈ ایگریکلچر اینڈ آرگنائزیشن نا اواری اٹ بناکروک آ پروگرام نا فیز II انا پوروی آن کشت وکشار، لائیو اسٹاک، دیر انا ویل آتے آن دم در بزغر و زمیندار تے ریلیف ملک۔
