اسلام آباد۔16نومبر(اے پی پی ) مزن وزیر عمران خان ءَ حکومت ءِ 100روچانی سرجمی، وانگءُ زانگ، جانءُ سلامتی ، نیزگاریءِ ہلاسی ءَ ہوار دگہ بازیں پڑآں پروگرام راجءِ دیما پیش کنگءِ جار جتگءُ گشتگ کہ جیڑہءُ جنجالاں آبید ہم لھتیں ماہ اَں مٹی کیئت، معیشت ءِ مھکمیں دیمروئی کنگءَ برآمداتءَ گیشی، زرکاری ءِ گیشی، ڈنی ملک ءَ ترسیلاتءَ را گیش کنگءُ منی لانڈرنگ ءَ را گرءُ دار کنگ لوٹ ایت، مئے جنگ جمہوریت دوستانی حلاپءَ نہ بلکیں ملک ءَ را تباہ کنوکانی حلاپ ایں، ملک ہما وہدءَ دیمروئی کُت نہ کنت وہد ے کہ راستیءَ جمہوریت مہ ایت۔ آئیءَ اے گپ کالم نبشتہ کنوکانی ڈلءَ گوں گپ ءُ تران کنانءَ کتگ کہ آہاں جمعہ ءِ روچءَ مزن وزیر کارگسءَ گندءُ نند کتگ۔ گندءُ نندءَ ہاسیں ملکی ءُ حکومتی پالیسی آنی سرءَ سرجمیءَ حیالءُ لیکہءِ درشانی بوتگ۔ مزن وزیرءَ گشتگ کہ انوگیں حکومت وتی 100روچانی سرجمیءَ وانگءُ زانگ ، جانءُ سلامتی ، نیزگاریءِ ہلاسی ءُ دگہ بازیں ہوالگءَ سرجمیں پدریں پروگرامءَ راجءِ دیماپیش کنت۔ مزن وزیرءَ گشتگ کہ بدبھتی ءَ چہ پاکستانءَ کدی ہم پہ جمہوریت ءَ کوشش کنگ نہ بوتگ۔ جمہوریت ءِ بدلءَ’’کلپٹو کریسی‘‘ ءِ رواج بوتگ۔ آئی ءَ گشتگ کہ بدبھتیءَ چہ ماانگت سرپد ی نیست کہ ملکءَ چینچو آسراتی اَست۔ تاں انوں ٹھیلءُ گیس ءِ پڑءَ ملکءِ تنا 6درسد بھر کارمرز بوتگ۔ آئیءَ گشتگ کہ ٹھیل ءُ گیس ءَ ابید اِدءَ دگہ چے چے اَست ہچ حکومتءَ اے نیمگءَ دلگوشی نہ کتگ۔
