اسلام آباد۔ 16نومبر (اے پی پی) اسپیکر قومی اسمبلی اسد قیصر تون پاکستان اٹی سعودی عرب نا سفیر نواف بن سعید المالکی جمعہ نادے پارلیمنٹ ہاؤس اٹی اوڑدہی کرے ہراٹی پاک ۔ سعودی عرب تعلقداری تون اوار تین پہ تینی است خواہی نا ایلو معاملہ غاتیا خیال آتا درشانی ءِ کننگا۔ داوخت آ اسپیکر قومی اسمبلی اسد قیصر سعودی سفیر تون ہیت وگپ کرسا پارے کہ پاکستان و سعودی عرب نا نیام اٹ برادرانہ دیرینہ تعلقداری ملکی و السی کہول انا ءُ۔ اوپارے کہ پاکستان ءِ سعودی عرب تون تینا سنگتی آ فخر ءِ، سعودی عرب ہر مشکل وخت اٹی پاکستان تون تفوک مسنے و ملوک آ است اٹ کمک کرینے۔ اسد قیصر پارے کہ وزیراعظم عمران خان نا سعودی عرب نا دورہ ٹی اودے ہرا شرف ملانے او ہڑتوم آ کنڈآتا تعلقداری تے پین سوگو جوڑ کننگ کن بنداوی کڑد ادا کرینے۔ اوپارے کہ پاکستانی تا بھلو کچ اس سعودی عرب اٹی چندی بشخ آتے ٹی خذمت سرانجام تننگ ءُ و تینا ملک اکن نہادی زرمبادلہ گدریفنگ ءُ۔ اوپارے کہ سعودی عرب اٹی معمولی وڑاٹ مقدمہ غاتے ٹی اوار پاکستانی تے کن خصوصی رعایت نا پڑو ءِ کننگے، سعودی عرب نا چین۔پاک اقتصادی راہداری ڈٹ اٹی اوار مننگ ستاکڑزک۔ قومی اسمبلی ٹی پاک۔سعودی عرب فرینڈ شپ گروپ ءِ فعال کرسا سنگتی نا رشتہ ءِ پین سوگو جوڑ کننگک۔
