اسلام آباد۔ 16نومبر (اے پی پی) چین پاکستان اقتصادی راہداری (سی پیک) ڈٹ انا رداٹ ڈیرہ اسماعیل خان ، ہکلہ موٹروے نا تعمیراتی کاریم پورو زور و شور اٹ برجاءِ ۔ کمامدارآتا رداٹ 285کلومیٹر مریس ڈیرہ اسماعیل خان ۔ہکلہ موٹروے چین پاکستان اقتصادی راہداری نا بشخ اسے۔ دا موٹروے اینخو نا مالی سال انا ایسر اسکان 129 ارب روپئی نا خڑچ آن پورو مریک۔ موٹروے آن ڈیرہ اسماعیل خان و بلوچستان اٹی واپاری و کاروباری سرجزآک ترند مریرہ۔ ڈٹ انا بروخت پوروی ءِ المی جوڑ کننگ کن ہکلہ ، ڈیرہ اسماعیل خان موٹروے ءِ یارک رحمانی خیل سیکشن، رحمانی خیل۔کوٹ بیلیاں سیکشن ۔کوٹ بیلیاں تراپ سیکشن ، تراپ، پنڈی گھیب سیکشن و پنڈی گھیب ، ہکلہ انٹرچینج سیکشن تون اوار پنچ مرحلہ غاتے ٹی بدل کننگانے۔ اقتصادی راہداری ہڑتوم آ ملک آتا نیام اٹ اہم بشخ آتے ٹی کمکاری آ مبنی گام گیج و ڈٹ آتا جامع پیکج ءِ ہرٹی اطلاعات نیٹ ورک ، بنداوی ڈھانچہ ، توانائی ، صنعت، کشت وکشار ، سیل وسوات و چندی ایلو بشخ آک اوار ءُ۔ اندازہ خلنگ مریک کہ پاک چین کمکاری نا مندرجہ بالا ڈٹ آتا پوروی آن پاکستان شونداری نا شاہراہ تے ٹی اخس اہم ءُ مزل عبور کیک۔
