اسلام آباد۔ 15نومبر (اے پی پی) بنجائی دارالحکومت اسلام آباد و گنڈوک آ شار راولپنڈی تون اوار مچ آ ملک اٹی خواجہ نبی پاک ؑ نا ودی دے ءِ اڈتننگ نا بابت تیاریک ترند مسنو، خلقت نا بھلو کچ اس خواجہ نبی پاک ؑ تون عقیدت و مابت نا درشانی نا وڑاٹ تینا اُرا، گلی و بازار تے ٹی چراغاں کرینو، ہرانا سوب بھلا شار تتون اوار قصبہ و خلق آتے ٹی ہم ندارہ غاک بے کچ است ءِ چکرہ، اُرا، مسیت و تعلیمی ادارہ غاتے ٹی خواجہ نا ودی دے انا بابت خصوصی پراگرام تا بنامسنے ہرافتے ٹی سیریت النبی ؑ و نعت رسول ؑ مقبول نا مقابلہ اڈتننگ انگ ءِ ہرافتے ٹی خواجہ ؑ نا حیات طیبہ نا جتا پہلو تے تالان کننگ تون اوار اوار داہیت آ ہم زور شاغنگ انگ ءِ کہ دنیا و آخرت نا سرسہبی تے مچ کننگ نا اسٹ انگا کسر خواجہ ؑ نا اسوہ حسنہ غا عمل کروئی ءِ، 20 و 21 نومبرآ بنجائی دارالحکومت اسلام آباد اٹی قومی سیرت کانفرنس اس اڈ ہلیک ہراٹی سعودی عرب ، ایران و مصر اتون اوار مچ آ ملک آن عالم دین تے بٹنگ انگانے۔ اینخو نا سال کانفرنس ناسرحال ’’رحمت اللعالمین‘‘ کانفرنس بسلسلہ جشن میلاد النبی ؑ تخنگانے۔ داوخت آ خواجہ نبی پاک ؑ نا والہانہ عشق و عقیدت نا درشانی نا وڑاٹ خلقت مریض آتے خون نا عطیہ ہم ایترہ۔
