اسلام آباد۔ 15نومبر (اے پی پی) چیئرمین سینیٹ صادق سنجرانی پارینے کہ ایوان نا چاگڑد ءِ پرامن و خوشگوار تخنگ کن حکومت آ زیات زمواری مریک ، غٹ باسک آک چیئر، قائد ایوان و قائد حزب اختلاف نا ہم بایدے شرف ءِ کیر و ایلو باسک آتا بارواٹ بایدے غلط لوز آتے کاریم اٹ اتنگپ، ایوان نا چاگڑد ءِ خوشگوار جوڑ کننگ کن اپوزیشن و حکومتی باسک آتے تینا تینا زمواری تے پورو کننگ نا گرج ءِ۔ پنچ شنبے نادے ایوان بالا ٹی چیئرمین سینیٹ صادق سنجرانی پارے کہ وزیر اطلاعات چوہدری فواد حسین اپوزیشن باسک آتا برخلاف پاروک آ سخت لوز آتیا بشخنداری کتو تو رواں سیشن نا ایلو دے تیٹی ایوان اٹی اونا پترینگ انگ آ پابندی مریک۔ سینیٹر فیصل جاوید پارے کہ غٹ وزیر آک و حکومتی باسک آک پارلیمنٹ نا تقدس و وقار نا پبی خیال ءِ تخرہ۔ اوپارے کہ ایوان نا تقدس ہمووخت آ پامال مریک ہراتم کس اس ایوان اٹی پاروک آ ہیت آ استثنیٰ خواہک، ایوان اٹی تو پاننگاسس کہ ’’ دادے ہمو ذرائع ہرافتے آن لندن نا فلیٹ آتے ہلنگا ولے او ذرائع شاید دروغ انا ذرائع اس ئس‘‘ ، داہیت متکن ءُ ہیت اس اف۔ سینیٹر طلحہ محمود پارے کہ ایوان نا تقدس نا خیال ءِ تخنگ بھاز المی ءِ، سینیٹر اعظم موسیٰ خیل پارے کہ نن بایدے سگ انا روایت ءِ لس کین۔ سینیٹر حاصل بزنجو پارے کہ ایوان نا تقدس و وقار ءِ برقرار تخنگ کن چیئرمین سینیٹ نا رولنگ بھاز اہم ءِ۔ سینیٹر عثمان کاکڑ پارے کہ نن اومیت کینہ کہ ایوان نا کارروائی ءِ جوانی اٹ مون آ دننگک۔ سینیٹر شیری رحمان پارے کہ اسہ ایلو نا برخلاف داوڑنا زبان ءِ بایدے کاریم اٹ اتنگپ ہراڑآن ایوان و چیئر نا تقدس پامال مرے۔
